ന്യുയോര്‍ക്ക്: കുട്ടികള്‍ക്കെതിരെയുള്ള ലൈംഗികാതിക്രമ ചിത്രങ്ങള്‍ ഉണ്ടായ രാജ്യങ്ങളുടെ പട്ടികയില്‍ ഇന്ത്യ ഒന്നാം സ്ഥാനത്തെന്ന് റിപ്പോര്‍ട്ട്. അന്താരാഷ്ട്ര മനുഷ്യക്കടത്ത് വിരുദ്ധ സംഘടനായ തോണ്‍, ഗൂഗിളുമായി സഹകരിച്ച് നടത്തിയ പഠനത്തിന്റെ റിപ്പോര്‍ട്ട് പുറത്തുവിട്ടത് അമേരിക്ക കേന്ദ്രമായി പ്രവര്‍ത്തിക്കുന്ന നാഷണല്‍ സെന്റര്‍ ഫോര്‍ മിസ്സിംഗ് ആന്‍ഡ് എക്‌സ്‌പ്ലോയിറ്റഡ് ചില്‍ഡ്രന്‍ എന്ന സംഘടനയുടെ നേതൃത്വത്തിലാണ്.
1998 മുതല്‍ 2017 വരെയുള്ള പത്തൊന്‍പത് വര്‍ഷത്തെ കേസുകള്‍ പഠിച്ചാണ് റിപ്പോര്‍ട്ട് തയ്യാറാക്കിയിരിക്കുന്നത്. റിപ്പോര്‍ട്ട് പ്രകാരം ഇന്ത്യ, തായ്‌ലന്റ്, ഇന്തോനേഷ്യ എന്നീ രാജ്യങ്ങളാണ് പട്ടികയില്‍ മുന്നില്‍. മെക്‌സിക്കോ, ബംഗ്ലാദേശ്, യുഎസ്എ, ബ്രസീല്‍, വിയറ്റ്‌നാം, അള്‍ജീരിയ, പാകിസ്ഥാന്‍ എന്നീ രാജ്യങ്ങളും പട്ടികയില്‍ ഇടംപിടിച്ചിട്ടുണ്ട്.
അതേസമയം കുട്ടികള്‍ക്കെതിരായ ലൈംഗികാതിക്രമ ചിത്രങ്ങള്‍ ഇന്റനെറ്റില്‍ പ്രചരിപ്പിച്ച രാജ്യങ്ങളുടെ പട്ടികയില്‍ ഇറാഖ്, തായ്‌ലന്‍ഡ്, സൊമാലിയ എന്നീ രാജ്യങ്ങളാണ് മുന്നില്‍.
ആഗോള തലത്തില്‍ കുട്ടികള്‍ക്കെതിരെയുള്ള ലൈംഗികാതിക്രമ ചിത്രങ്ങള്‍ വര്‍ധിക്കുകയാണെന്നും ഒരോ മാസവും 10 ലക്ഷം കേസുകളാണ് റിപ്പോര്‍ട്ട് ചെയ്യുന്നതെന്നും പഠനത്തില്‍ പറയുന്നു.2.3 കോടി കേസുകളാണ് 1998-2017 കാലയളവില്‍ റിപ്പോര്‍ട്ട് ചെയ്തത്.
0 Comments