റോഡിലെ നിയമലംഘനത്തിന് സെപ്‌ററംബര്‍ ഒന്ന് മുതല്‍ വന്‍ പിഴ

തിരുവനന്തപുരം: റോഡില്‍ നിയമം ലംഘിക്കുന്നവര്‍ക്ക് വന്‍ തുക പിഴയീടാക്കാനുള്ള പുതിയ ഭേദഗതി സെപ്റ്റംബര്‍ ഒന്നിനു നിലവില്‍ വരും. നേരത്തേ നടന്ന നിയമലംഘനങ്ങള്‍ക്ക് പിഴശിക്ഷ തീരുമാനിക്കുന്നതു സെപ്റ്റംബര്‍ ഒന്നിനു ശേഷമാണെങ്കില്‍ വര്‍ധന ബാധകമാകും. ഇതിനു മുന്നോടിയായി 'ട്രാഫിക് നിയമങ്ങള്‍ പാലിക്കൂ, നിങ്ങളുടെ കാശു ലാഭിക്കൂ' എന്ന ബോധവത്കരണ പരിപാടിയുമായി മോട്ടര്‍ വാഹന വകുപ്പും റോഡ് സുരക്ഷ അതോറിറ്റിയും രംഗത്തെത്തി.
പുതുക്കിയ പിഴതുക അനുസരിച്ച് മദ്യപിച്ച് വാഹനമോടിച്ചാല്‍ 2000 മുതല്‍ 10,000 വരെയാണ് പിഴ. ഹെല്‍മെറ്റ്, സീറ്റ് ബെല്‍റ്റ് തുടങ്ങിയവ ധരിക്കാത്തതിന് 1000 രൂപ പിഴയടയ്‌ക്കേണ്ടിവരും. ലൈസന്‍സ് ഇല്ലാതെ വാഹനമോടിച്ചാല്‍ 5000 രൂപയും വാഹനമോടിക്കുന്നതിനിടെ മൊബൈല്‍ ഫോണ്‍ ഉപയോഗിച്ചാസ് 10,000രൂപയുമാണ് പിഴ. മത്സരയോട്ടം (5000), ഇന്‍ഷുറന്‍സ് ഇല്ലാതെ വാഹനമോടിക്കല്‍ (2000), അപകടകരമായ ഡ്രൈവിങ് (1000 5000), ലൈസന്‍സ് വ്യവസ്ഥകള്‍ ലംഘിച്ചാല്‍ (25,000 1 ലക്ഷം), വാഹനത്തിന് പെര്‍മിറ്റ് ഇല്ലെങ്കില്‍ (5000 10,000) എന്നിങ്ങനെയാണ് പിഴ.