ഡല്‍ഹിയില്‍ തിങ്കളാഴ്ച രാത്രി 11 മണിയോടെ വീശിയ കനത്ത കാറ്റിനെ തുടര്‍ന്ന് മെട്രോ ഉള്‍പ്പടെയുള്ള ഗതാഗത സംവിധാനങ്ങള്‍ക്ക് നിയന്ത്രണം ഏര്‍പ്പെടുത്തി. അതേസമയം, ജമ്മു കാശ്മീര്‍, ഉത്തരാഖണ്ഡ്, ഹിമാചല്‍ പ്രദേശ്, പഞ്ചാബ്, ഹരിയാന, ചണ്ഡിഗഢ്, ഡല്‍ഹി, പടിഞ്ഞാറന്‍ യു.പി, സിക്കിം, ബംഗാള്‍ എന്നിവിടങ്ങളില്‍ അടുത്ത 48 മണിക്കൂര്‍ നേരത്തേക്ക് ജാഗ്രതാ നിര്‍ദേശമുണ്ട്.
ശക്തമായ കാറ്റും മഴയും നഗരത്തില്‍ തുടരുമെന്ന് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. തിങ്കളാഴ്ച ഉയര്‍ന്ന താപനിലയായ 39.6 ഡിഗ്രി സെല്‍ഷ്യസ് രേഖപ്പെടുത്തിയതിന്റെ പിന്നാലെയായിരുന്നു മഴയും കാറ്റും. സ്‌കൂളുകള്‍ ഉള്‍പ്പടെയുള്ളവയ്ക്ക് ചൊവ്വാഴ്ച അവധിയായിരുന്നു.
അടിയന്തര സാഹചര്യങ്ങളെ നേരിടാന്‍ സുരക്ഷാ സേനയ്ക്കും നിര്‍ദേശം നല്‍കിയിട്ടുണ്ട്. ഉത്തരേന്ത്യന്‍ സംസ്ഥാനങ്ങളില്‍ കഴിഞ്ഞയാഴ്ച ഉണ്ടായ പൊടിക്കാറ്റില്‍ 125-ഓളം പേര്‍ കൊല്ലപ്പെടുകയും 3000ത്തോളം പേര്‍ക്ക് പരിക്കേല്‍ക്കുകയും ചെയ്തിരുന്നു.
അതേസമയം, തിരുവനന്തപുരം നഗരത്തില്‍ പെയ്ത അതിശക്തമായ മഴയില്‍ കനത്ത നാശനഷ്ടം ഉണ്ടായിട്ടുണ്ട്. നഗരത്തിലെ പല പ്രദേശങ്ങളും വെള്ളത്തിനടിയിലാവുകയും പലയിടത്തും ഗതാഗതം സ്തംഭിക്കുകയും ചെയ്തു. തിരുവനന്തപുരം വിമാനത്താവളത്തില്‍ വൈദ്യുതി ബന്ധം തടസപ്പെട്ടതായും ലഗേജുകളില്‍ വെള്ളം കയറിയതായും യാത്രക്കാര്‍ പരാതിപ്പെട്ടു.
0 Comments