കര്‍ണാടകയില്‍ കുമാരസ്വാമിയെ മുഖ്യമന്ത്രിയാക്കി ഭരണം പിടിക്കാൻ കോൺഗ്രസ്

ബംഗളൂരു: കർണാടകയിൽ ഏറ്റവും വലിയ ഒറ്റകക്ഷിയായ ബി.ജെ.പിയെ അധികാരത്തിൽ എത്തുന്നതിൽ നിന്ന് തടയുന്നതിന് വേണ്ടി കോൺഗ്രസ് കരുനീക്കം തുടങ്ങി. തനിച്ച് ഭരിക്കാൻ ഭൂരിപക്ഷമില്ലാത്തതിനാൽ 39 സീറ്റുള്ള ജനതാദൾ എസിനെ കൂട്ടുപിടിച്ച് സർക്കാരുണ്ടാക്കാനാണ് കോൺഗ്രസിന്റെ ശ്രമം. ഇതിന്റെ ഭാഗമായി ജെ.ഡി.എസ് നേതാവ് എച്ച്‌.‌ഡി.കുമാരസ്വാമിക്ക് കോൺഗ്രസ് മുഖ്യമന്ത്രി പദം വാഗ്ദ്ധാനം ചെയ്തിട്ടുണ്ട്.

മുതിർന്ന കോൺഗ്രസ് നേതാവ് ഗുലാം നബി ആസാദ് ജെ.ഡി.എസ് അദ്ധ്യക്ഷൻ ദേവഗൗഡയുമായി ചർച്ച നടത്തി. കോൺഗ്രസ് മുൻ അദ്ധ്യക്ഷ സോണിയാ ഗാന്ധിയും ദേവഗൗഡയുമായി ഫോണിൽ ചർച്ച നടത്തി. ബി.ജെ.പിയെ അധികാരത്തിൽ നിന്ന് അകറ്റി നിറുത്താൻ ജെ.‌ഡി.എസിനെ നിരുപാധികം പിന്തുണയ്ക്കാമെന്ന് കോൺഗ്രസ് അറിയിച്ചതായാണ് സൂചന. മന്ത്രിമാരെ തീരുമാനിക്കാനുള്ള അവകാശവും നൽകാമെന്ന് കോൺഗ്രസ് ജെ.ഡി.എസിന് ഉറപ്പ് നൽകിയതായാണ് റിപ്പോർട്ട്. ഭരണത്തിലിരുന്ന കർണാടകയിൽ ഇനി അധികാരരാഷ്ട്രീയം ഇല്ലെങ്കിലും സാരമില്ല എന്ന നിലപാടിലാണ് കോൺഗ്രസ് എത്തിയിരിക്കുന്നത്.

അതേസമയം,​ കുമാരസ്വാമി മുഖ്യമന്ത്രിയാവുമെന്ന് ജെ.ഡി.എസ് വക്താവ് ഡാനിഷ് അലി പറഞ്ഞു.