ബിഹാറിൽ ആർ.ജെ.ഡിയും ഗോവയിൽ കോൺഗ്രസും സർക്കാർ രൂപീകരണത്തിന്​

പനാജി: കർണാടകയെ പിന്തുടർന്ന്​ സർക്കാർ രൂപീകരണ ആവശ്യവുമായി ഗോവയിലെയും ബിഹാറിലെയും ഏറ്റവും വലിയ ഒറ്റകക്ഷികളായ കോൺ​ഗ്രസും ആർ.ജെ.ഡിയും രംഗത്ത്​. ആർ.ജെ.ഡിയാണ്​ ബിഹാറിലെ ഏറ്റവും വലിയ ഒറ്റകക്ഷി. സംസ്ഥാനത്ത്​ സർക്കാരുണ്ടാക്കാൻ അനുവദിക്കണമെന്ന്​ ആർ.ജെ.ഡി നേതാവ്​​ തേജസ്വി യാദവ് ആവശ്യപ്പെട്ടു​. എം.എൽ.എമാർക്കൊപ്പം ഗവർണറെ കാണുമെന്നും തേജസ്വി​ പറഞ്ഞു.

അതേസമയം കേവല ഭൂരിപക്ഷമില്ലാതെ പ്രാദേശിക പാർട്ടികളുടെ സഹായത്തോടെ ബി.ജെ.പി അധികാരത്തിലേറിയ ഗേവയിൽ സർക്കാർ രൂപീകരിക്കാൻ അവകാശവാദം ഉന്നയിച്ച്​ 16 കോൺഗ്രസ്​ എം.എൽ.എമാർ നാളെ ഗവർണറെ കാണാൻ​ അനുവാദം തേടി​. ഭൂരിപക്ഷം തെളിയിക്കാൻ 15 ദിവസത്തെ സാവകാശം നൽകണമെന്നും എം.എൽ.എമാർ ആവശ്യപ്പെട്ടിട്ടുണ്ട്​. എന്നാൽ ഗവർണർ എന്തു മറുപടിയാണ്​ നൽകുകയെന്ന്​ വ്യക്​തമല്ല. കർണാടകയിലും ഗോവയിലും രണ്ട്​ മാനദണ്ഡം പാടില്ലെന്ന്​ ഗോവ കോൺ​ഗ്രസ്​ അധ്യക്ഷൻ ഗിരീഷ്​ ചൗധാൻകർ പറഞ്ഞു. കർണാടകയിൽ ഏറ്റവും വലിയ ഒറ്റകക്ഷിക്ക്​ അധികാരത്തിലേറാമെങ്കിൽ​ ഇവിടെയും അതനുവദിക്കണമെന്നും അദ്ദേഹം പറഞ്ഞു.

2017 ഫെബ്രുവരിയിൽ നടന്ന തെരഞ്ഞെടുപ്പിൽ 17 സീറ്റുകൾ നേടി ഏറ്റവും വലിയ ഒറ്റ കക്ഷിയായത്​ കോൺഗ്രസായിരുന്നു. ​ആർക്കും കേവല ഭൂരിപക്ഷം ലഭിക്കാത്ത ഗോവയിൽ 13 സീറ്റുകൾ മാ​ത്രം നേടിയ ബി.ജെ.പി പ്ര​േദശിക പാർട്ടികളുടെ സഹായത്തോടെ  21 സീറ്റുകൾ തികച്ച്​ സർക്കാർ രൂപീകരിക്കാൻ അവകാശവാദം ഉന്നയിക്കുകയായിരുന്നു. പ്രാദേശിക പാർട്ടികളെ പിടിക്കാൻ കോൺഗ്രസ്​ ആലോചിക്കു​േമ്പാഴേക്കും  കേന്ദ്ര പ്രതിരോധ മന്ത്രിയായിരുന്ന മനോഹർ പരീകറിനെ രാജി​െവപ്പിച്ച്​ മുഖ്യമന്ത്രി സ്​ഥാനം നൽകി സർക്കാർ രൂപീകരണം ബി.ജെ.പി പൂർത്തിയാക്കിയിരുന്നു.

ഇതേതന്ത്രം കർണാടകയിൽ ജെ.ഡി.എസിനെ കൂട്ടു പിടിച്ച്​ കോൺ​ഗ്രസ്​ പയറ്റിയപ്പോൾ ബി.ജെ.പി ചായ്​വുള്ള ഗവർണർ ഏറ്റവും വലിയ ഒറ്റ കക്ഷിയെ സർക്കാറുണ്ടാക്കാൻ ക്ഷണിക്കുകയും ഭൂരിപക്ഷം തെളിയിക്കാൻ മു​െമ്പങ്ങുമില്ലാത്ത വിധം 15 ദിവസത്തെ സമയം അനുവദിക്കുകയും ചെയ്​തു. ഇതിൽ പ്രതിഷേധിച്ചാണ്​ ഗോവ കോൺഗ്രസ്​ എം.എൽ.എമാർ ഗവർണറെ കാണാനിരിക്കുന്നത്​.

നിലവിൽ ഗോവ മുഖ്യമന്ത്രി മനോഹർ പരീകർ അസുഖബാധിതനായി ചികിത്​സയിലായതിനാൽ ഭരണം സ്​തംഭിച്ചിരിക്കുകയാണെന്ന്​ കോൺഗ്രസ്​ നേരത്തെ പരാതിപ്പെട്ടിരുന്നു. ഗോവക്ക്​ മുഖ്യമന്ത്രിയെ തരൂവെന്ന്​ കോൺ​ഗ്രസ്​ നേതാക്കൾ മോദിയോട്​ ആവശ്യപ്പെടുകയും ചെയ്​തിരുന്നു.