ന്യൂഡൽഹി: പശുവിൻ ചാണകം അടിസ്ഥാനമാക്കി നിര്‍മിച്ച പുതിയ പെയിൻ്റ് പുറത്തിറക്കാൻ കേന്ദ്രസര്‍ക്കാര്‍ സ്ഥാപനം. കേന്ദ്രസര്‍ക്കാരിൻ്റെ നിയന്ത്രണത്തിൽ പ്രവര്‍ത്തിക്കുന്ന ഖാദി, ഗ്രാമീണ വ്യവസായ കമ്മീഷൻ ആണ് പുതിയ "വേദിക് പെയിൻ്റ്" പുറത്തിറക്കുന്നത്. കേന്ദ്രമന്ത്രി നിതിൻ ഗഡ്കരിയാണ് പുതിയ ഉത്പന്നം ഉത്ഘാടനം ചെയ്യുന്നത്.
ചാണകമാണ് പുതിയ പെയിൻ്റിലെ പ്രധാന ഘടകം. "ഖാദി പ്രകൃതിക് പെയിൻ്റ്" എന്ന വിശേഷണത്തോടെ പുറത്തിറക്കുന്ന പെയിൻ്റ് പരിസ്ഥിതി സൗഹൃദമാണെന്നാണ് സ്ഥാപനം അവകാശപ്പെടുന്നത്. ഇതാദ്യമായാണ് ഇത്തരത്തിലൊരു ഉത്പന്നം പുറത്തിറക്കുന്നതെന്നും നിതിൻ ഗഡ്കരിയുടെ ഓഫീസ് പുറത്തിറക്കിയ പത്രക്കുറിപ്പ് ഉദ്ധരിച്ചുള്ള റിപ്പോര്‍ട്ടിൽ പറയുന്നു. പുതിയ ഉത്പന്നത്തിന് ബിഐഎസ് അംഗീകാരം ലഭിച്ചിട്ടുണ്ടെന്നും പെയിൻ്റിന് വില കുറവാണെന്നും വാര്‍ത്താക്കുറിപ്പിൽ വ്യക്തമാക്കിയിട്ടുണ്ട്.
ഡിസ്റ്റംബര്‍ രൂപത്തിലും പ്ലാസ്റ്റിക് ഇമൽഷനായും രണ്ട് തരത്തിൽ ചാണക പെയിൻ്റ് ലഭ്യമാകും. കഴിഞ്ഞ വര്‍ഷം മാര്‍ച്ചിലാണ് കമ്മീഷൻ ഇതു സംബന്ധിച്ച പ്രോജക്ട് തയ്യാറാക്കിയത്. ഇതിനു ശേഷം ജയ്പൂരിലെ കുമാരപ്പ നാഷണൽ ഹാൻഡ് മെയ്ഡ് പേപ്പര്‍ ഇൻസ്റ്റിറ്റ്യൂട്ട് ഉത്പന്നം വികസിപ്പിക്കുകയായിരുന്നു. സാധാരണ പെയിൻ്റുകളിൽ ലെഡ്, മെര്‍ക്കുറി, ക്രോമിയം, ആര്‍സെനിക്, കാഡ്മിയം തുടങ്ങിയ ഹാനികരമായ ഉത്പന്നങ്ങളുണ്ടെങ്കിൽ ഈ പെയിൻ്റിൽ ഇത്തരം ഘടകങ്ങള്‍ ഒന്നുമില്ലെന്നാണ് അവകാശവാദം.
സാങ്കേതിക വിദ്യ ഫലപ്രദമായി ഉപയോഗിക്കുന്നതു വഴി ആളുകള്‍ക്ക് തൊഴിൽ ലഭ്യത വര്‍ധിപ്പിക്കാനും പ്രാദേശികാടിസ്ഥാനത്തിൽ നിര്‍മാണം നടത്താനും സാധിക്കുമെന്നും റിപ്പോര്‍ട്ടിൽ പറയുന്നു. പെയിൻ്റിൻ്റെ അസംസ്കൃത വസ്തു ചാണകമായതിനാൽ ഇത് കര്‍ഷകര്‍ക്ക് അധികവരുമാനം നേടാൻ സഹായിക്കുമെന്നും റിപ്പോര്‍ട്ടിൽ പറയുന്നുണ്ട്.
0 Comments