'ഖിറാന്‍-2018' സമൂഹ വിവാത്തിന്റെ ബ്രോഷര്‍ പ്രകാശനം ചെയ്തു

കാഞ്ഞങ്ങാട്: ജനുവരി 14 മുതല്‍ 21വരെ സൗത്ത് ചിത്താരി  പി എ ഉസ്താദ് നഗറില്‍ എസ് വൈ എസ് സാന്ത്വനം പ്രവര്‍ത്തകര്‍ സംഘടിപ്പിക്കുന്ന സമൂഹ വിവാഹം 'ഖിറാന്‍-2018'ന്റെ ബ്രോഷര്‍ പ്രകാശനം ചെയ്തു.  സിറാജ് അബ്ദുള്ള ഹാജി  സംഘാടക സമിതി ചെയര്‍മാന്‍ ഇസ്മായിൽ ചിത്താരിക്ക് നൽകിയാണ് പ്രകാശന കർമ്മം നിർവ്വഹിച്ചത്. 'ഖിറാന്‍-2018' വേദിയില്‍ വെച്ച് അഞ്ച് യുവതികള്‍ സുമംഗലികളാവും. സ്ത്രീധനം നല്‍കാന്‍ പണം ഇല്ലാത്തതിന്റെ പേരില്‍ വിവാഹം നടക്കാതെപോയ യുവതികള്‍ക്കുവേണ്ടിയാണ് പദ്ധതി നടപ്പാക്കുന്നത്. വിവാഹധൂര്‍ത്ത് അവസാനിപ്പിക്കുകയും സ്ത്രീധനം നിരുത്സാഹപ്പെടുത്തുകയും പദ്ധതിയുടെ ലക്ഷ്യമാണ്. തെരഞ്ഞെടുക്കപ്പെടുന്ന യുവതികള്‍ക്ക് ആഭരണവും അഞ്ച് സെന്റ്‌ സ്ഥലവും നല്‍കും. കാന്തപുരം എ.പി അബൂബക്കര്‍ മുസ്ലിയാര്‍ നിക്കാഹിന് കാര്‍മ്മികത്വം വഹിക്കും.
പരിപാടിയുടെ ഭാഗമായി വിവിധ വിഷയങ്ങളില്‍ സെമിനാറുകള്‍, സാംസ്കാരിക സമ്മേളനം, സയ്യദ് സംഗമം,  മതപ്രഭാഷണം, പ്രവാചക പ്രകീര്‍ത്തന സദസ്സ്, മെഡിക്കല്‍ ക്യാമ്പ്, ആദരിക്കല്‍ ചടങ്ങ്, 'സന്തുഷ്ട കുടുംബം' ഫാമിലി കൌണ്‍സലിംഗ് ക്ലാസ്,  ദിക്ര്‍-ദുആ സദസ്സ് തുടങ്ങിയ നിരവധി പരിപാടികള്‍ നടക്കും. കേരളത്തിലെയും വിവിധ സംസ്ഥാനങ്ങളിലെയും  മന്ത്രിമാരും, മത സാമൂഹ്യ സാംസ്കാരിക നേതാക്കളും പരിപാടിയില്‍ സംബന്ധിക്കും.

ബ്രോഷര്‍ പ്രകാശന ചടങ്ങില്‍ ഇസ്മായിൽ ചിത്താരി അദ്ധ്യക്ഷത വഹിച്ചു. ചിത്താരി അബ്ദുള്ള ഹാജി ഉദ്ഘാടനം ചെയ്തു. റഷീദ് കൂളിക്കാട്, അബ്ദുൾ ഖാദർ ഹാജി ചേറ്റുകുണ്ട്, ഏ.കെ അബ്ദുൾ റഹ്മാൻ, റാഷിദ് കൊവ്വൽ, മുഹമ്മദ് ശെരീഫ് സിറാജ്, ഏ.കെ അബ്ദുൾഖാദർ, സുബൈർ  കെ.എം.കെ, അസീസ് ചാപ്പയിൽ, അജീർ വി.പി റോഡ്‌ എന്നിവർ സംസാരിച്ചു. റിയാസ് അമലടുക്കം സ്വാഗതവും ഹംസ ഖാജ നന്ദിയും പറഞ്ഞു.