ഷുഹൈബ് വധം: പൊലീസ് കുറ്റപത്രം സമർപ്പിച്ചു,​ ഗൂഢാലോചനയെ കുറിച്ച് പരാമർശമില്ല

കണ്ണൂർ: യൂത്ത് കോൺഗ്രസ് മട്ടന്നൂർ നിയോജക മണ്ഡലം സെക്രട്ടറി ഷുഹൈബിനെ വെട്ടികൊലപ്പെടുത്തിയ കേസിൽ പൊലീസ്  മട്ടന്നൂർ കോടതിയിൽ കുറ്റപത്രം സമർപ്പിച്ചു. 386 പേജുള്ള കുറ്റപത്രത്തിൽ വധത്തിന് പിന്നിൽ ഗൂഢാലോചന സംബന്ധിച്ച പരാമർശമില്ല. സി.പി.എം - കോൺഗ്രസ് സംഘർഷമാണ് കൊലയ്ക്ക് കാരണമെന്ന് കുറ്റപത്രത്തിൽ പറയുന്നു. അതേസമയം,​ ഗൂഢാലോചന സംബന്ധിച്ച് അന്വേഷണം നടക്കുകയാണെന്നും പുതിയ കുറ്റപത്രം പിന്നീട് സമർപ്പിക്കുമെന്ന് അന്വേഷണ ഉദ്യോഗസ്ഥനായ സി. ഐ എ.വി.ജോൺ കോടതിയെ അറിയിച്ചു.

തില്ലങ്കേരിയിലെ സി.പി.എം പ്രവർത്തകൻ ആകാശ് തില്ലങ്കേരി (28), രജിൽ രാജ് (29), ജിതിൻ (28), ദീപ്ചന്ദ് (25), അഖിൽ (27), അൻവർ സാദത്ത് (32), സഞ്ജയ് (26), രജത്ത് (24), സംഗീത് (26), കെ.ബൈജു (36), അസ്‌കർ (28) എന്നിവരാണ് കേസിലെ പ്രതികൾ. കൊലപാതകം,​ സംഘം ചേർന്നുള്ള ആക്രമണം, വധശ്രമം, തെളിവ് നശിപ്പിക്കൽ എന്നീ കുറ്റങ്ങളാണ്  പ്രതികൾക്കെതിരെ ചുമത്തിയിരിക്കുന്നത്.

നേരത്തെ ഷുഹൈബ് വധക്കേസ് ഹൈക്കോടതി സിംഗിൾ ബെഞ്ച് സി.ബി.ഐക്ക് കൈമാറാൻ ആവശ്യപ്പെട്ടിരുന്നെങ്കിലും സർക്കാരിന്റെ അപ്പീലിൽ ഡിവിഷൻ ബെഞ്ച് ഉത്തരവ് സ്റ്റേ ചെയ്തിരുന്നു. ഇതേ തുടർന്ന് ഷുഹൈബിന്റെ പിതാവ് ഇതിനെതിരെ സുപ്രീം കോടതിയെ സമീപിച്ചിട്ടുണ്ട്. കേസ് ഫയലിൽ സ്വീകരിച്ച കോടതി ജൂലായിലേക്ക് കേസ് മാറ്റിവച്ചിരിക്കുകയാണ്. ഇക്കാര്യത്തിൽ സർക്കാരിൽ നിന്ന് വിശദീകരണം തേടിയ സുപ്രീം കോടതിയ്ക്ക് പൊലീസ് അന്വേഷണത്തിൽ കണ്ടെത്തിയ കാര്യങ്ങൾ സർക്കാർ വിശദമായി സമർപ്പിച്ചിട്ടുമുണ്ട്. കേസിലെ ഒൻപതാം പ്രതിയ്ക്ക് ജാമ്യം ലഭിച്ചിരുന്നു.