ചാമുണ്ഡേശ്വരിയില്‍ സിദ്ധരാമയ്യയെ തോല്‍പ്പിച്ചത് ബിജെപി-ജെഡിഎസ് രഹസ്യധാരണ

തന്റെ രാഷ്ട്രീയജീവിതത്തില്‍ സിദ്ധരാമയ്യ ഇതിന് മുന്‍പ് നാല് തവണ വിജയിച്ച് കയറിയ മണ്ഡലമാണ് കര്‍ണാടകയിലെ ചാമുണ്ഡേശ്വരി. എന്നാല്‍, ഇത്തവണ ഈ മണ്ഡലത്തില്‍ അദ്ദേഹത്തിന് കാലിടറി. അതിന് പിന്നില്‍ പ്രവര്‍ത്തിച്ചതായി രാഷ്ട്രീയ നിരീക്ഷകര്‍ മുന്നോട്ടുവെയ്ക്കുന്ന കാരണം ജെഡിഎസ്-ബിജെപി രഹസ്യധാരണയാണെന്നാണ്.

ബിജെപിയുടെ ബി ടീമായിട്ടാണ് ജെഡിഎസ് പ്രവര്‍ത്തിക്കുന്നതെന്നും കോണ്‍ഗ്രസിനെ തോല്‍പ്പിക്കാന്‍ രഹസ്യധാരണകള്‍ ഉണ്ടാക്കിയിട്ടുണ്ടെന്നും കോണ്‍ഗ്രസ് നേരത്തെ തന്നെ ആരോപണം ഉന്നയിച്ചിരുന്നു. ഇത് യഥാര്‍ത്ഥത്തില്‍ സംഭവിച്ചു എന്നുവേണം ചാമുണ്ഡേശ്വരിയിലെ ഫലങ്ങള്‍ തെളിയിക്കുന്നത്.

ചാമുണ്ഡേശ്വരിയില്‍ ജനതാദള്‍ സെക്കുലര്‍ സ്ഥാനാര്‍ത്ഥി ദേവഗൗഡയാണ് വിജയിച്ചത്. 15,000 ത്തില്‍പരം വോട്ടുകളുടെ ഭൂരിപക്ഷത്തിലാണ് ദേവഗൗഡ വിജയിച്ചത്. എസ്.ആര്‍. ഗോപാല്‍റാവുവായിരുന്നു ഇവിടുത്തെ ബിജെപി സ്ഥാനാര്‍ത്ഥി. സിദ്ധരാമയ്യയെ പോലെ ശക്തനായൊരു നേതാവിനെതിരെ താരതമ്യേനെ പ്രശസ്തനല്ലാത്ത ഒരാളെയാണ് ബിജെപി സ്ഥാനാര്‍ത്ഥിയാക്കി നിര്‍ത്തിയത്. ഇത് തന്നെ വോട്ടുമറിക്കലിന്റെ ലക്ഷണങ്ങളാണെന്നാണ് രാഷ്ടീയ നിരീക്ഷകര്‍ വിലയിരുത്തിയത്. 2000 ത്തോളം വോട്ടുകള്‍ മാത്രമാണ് ഇവിടുത്തെ ബിജെപി സ്ഥാനാര്‍ത്ഥിക്ക് ലഭിച്ചത്.