യെദ്യൂരപ്പ നാണംകെട്ട് മുഖ്യമന്ത്രി പദത്തില്‍ നിന്ന് തടിയൂരി

വിശ്വാസവോട്ടിന് കാത്തു നില്‍ക്കാതെ മുഖ്യമന്ത്രിയായി മൂന്നാംനാള്‍ യെദ്യൂരപ്പ നാണം കെട്ട് രാജിവെച്ചു. വിശ്വാസ വോട്ടെടുപ്പിന് മുമ്പ് യെദ്യൂരപ്പ രാജി നല്‍കുമെന്ന് നേരത്തെ റിപ്പോര്‍ട്ട് ഉണ്ടായിരുന്നു.

നിലവിലെ സാഹചര്യത്തില്‍ ഭൂരിപക്ഷം നേടുക ബുദ്ധിമുട്ടാണെന്ന് മനസിലാക്കിയ ബിജെപി യെദ്യൂരപ്പയോട് രാജി വച്ച് മുഖം രക്ഷിക്കാനാവശ്യപ്പെട്ടുവെന്നാണ് പുറത്തുവരുന്ന റിപ്പോര്‍ട്ട്. 13 പേജുള്ള രാജി പ്രസംഗം വായിച്ചശേഷമാണ് നാണംകെട്ടുള്ള രാജി പ്രഖ്യാപനം നടത്തിയത്. അദേഹം രാജിക്കത്ത് ഗവര്‍ണര്‍ക്ക് കൈമാറാനായി രാജ്ഭവനിലേക്ക്് തിരിച്ചു.

എന്തായാലും അഞ്ചു ദിവസമായി രാജ്യത്തെ മുള്‍മുനയില്‍ നിര്‍ത്തി കര്‍ണാടകത്തില്‍ അരങ്ങേറിയ രാഷ്ട്രീയ നാടകങ്ങള്‍ക്ക് ഇതോടെ പുതിയ വഴിത്തിരിവായി. 2007 ല്‍ ഏഴു ദിവസം മുഖ്യമന്ത്രിയായിരുന്ന യെദ്യൂരപ്പയ്ക്ക് സഭയില്‍ വിശ്വാസം തെളിയിക്കാനാവാതെ രാജി വയ്‌ക്കേണ്ടി വന്നിരുന്നു. അന്നും ഇതുപോലെ പ്രസംഗം നടത്തി ബലിയാട് എന്ന ഇമേജില്‍ രാജി വയ്ക്കുകയായിരുന്നു.

തനിക്ക് വോട്ട് ചെയ്ത ജനങ്ങളോടും പ്രധാനമന്ത്രി നരേന്ദ്രമോദിക്കും ബിജെപി അധ്യക്ഷന്‍ അമിത് ഷായ്ക്കും നന്ദി പറഞ്ഞുകൊണ്ടാണ് യെദ്യൂരപ്പ പ്രസംഗം തുടങ്ങിയത്. കോൺഗ്രസിനും ജെഡിഎസിനും ഭൂരിപക്ഷം കിട്ടിയില്ല. തെരഞ്ഞെടുപ്പിന് ശേഷം അവർ അവിശുദ്ധ കൂട്ടുകെട്ടുണ്ടാക്കി. കുമാരസ്വാമി മുഖ്യമന്ത്രി ആകില്ലെന്ന് നേരത്തേ സിദ്ധരാമയ്യ പറഞ്ഞു.

ഇപ്പോൾ കുമാരസ്വാമിയെ മുഖ്യമന്ത്രിയാക്കാൻ സിദ്ധരാമയ്യ ശ്രമിക്കുന്നു. അവസാന ശ്വാസം വരെ ജനങ്ങൾക്കായി പ്രവർത്തിക്കും. കുടിവെള്ളം പോലും നൽകാൻ കോൺഗ്രസിന് കഴിഞ്ഞില്ല. എത്ര സീറ്റ് കിട്ടി എന്നതല്ല, ജനം എന്താഗ്രഹിക്കുന്നു എന്നതാണ് പ്രധാനം. ജനങ്ങളെ ഇനിയും സേവിക്കണം. കർഷകരുടെ വായ്പ എഴുതി തള്ളണമെന്നാണ് ആഗ്രഹമെന്നും അദ്ദേഹം പറഞ്ഞു.

പ്രസംഗത്തിനിടെ ഒന്നിലധികം തവണ സിദ്ധരാമയ്യ തടസ്സപ്പെടുത്താന്‍ ശ്രമിച്ചു. പ്രസംഗം നീട്ടിക്കൊണ്ടുപോകാതെ വോട്ടെടുപ്പിലേക്ക് കടക്കണമെന്ന് അദ്ദേഹം ആവശ്യപ്പെട്ടു. എന്നാല്‍ ഇത് അവഗണിച്ച് യെദ്യൂരപ്പ പ്രസംഗം തുടര്‍ന്നു. അര മണിക്കൂറോളം തുടര്‍ന്ന പ്രസംഗത്തിനൊടുവില്‍ വോട്ടെടുപ്പിലേക്ക് കടക്കാതെ അദ്ദേഹം രാജി പ്രഖ്യാപനവും നടത്തി.  തൊട്ട് പിന്നാലെ യെദ്യൂരപ്പ സഭയ്ക്ക് പുറത്തേക്ക് പോയി. കോണ്‍ഗ്രസ് ജെഡിഎസ് അംഗങ്ങള്‍ വിജയചിഹ്നം ഉയര്‍ത്തി സന്തോഷം പങ്കുവെച്ചു. ഡി.കെ. ശിവകുമാര്‍ കുമാരസ്വാമിയുടെ സീറ്റിനടുത്തെത്തി അദ്ദേഹത്തിന്‍റെ കൈ പിടിച്ചുയർത്തി.സിദ്ധരാമയ്യക്ക് അംഗങ്ങള്‍ ഹസ്തദാനം നടത്തി.

വിശ്വാസ വോട്ടെടുപ്പിന് തൊട്ടു മുമ്പ് സത്യപ്രതിജ്ഞാ ചടങ്ങ് പുരോഗമിക്കുമ്പോള്‍ സഭയിലെ നിലവിലെ അംഗങ്ങള്‍ ഇപ്രകാരമായിരുന്നു. ്‌കോണ്‍ഗ്രസ് സഖ്യം-112, (കോണ്‍-76,ജെഡിഎസ്-36)മറ്റുള്ളവര്‍ രണ്ട്. ഇതില്‍ ഭൂരിപക്ഷം തെളിയിക്കാന്‍ സാധിക്കില്ലെന്ന് വ്യക്തമായതോടെയാണ് രാജി.