ഇന്ത്യൻ റെയിൽവേ സുരക്ഷാ സേനയിലേക്ക് [ആർ പി എഫ്] റിക്രൂട്മെന്റ് നടത്തുന്നു

ഇന്ത്യൻ റെയിൽവേ സുരക്ഷാ സേനയിലേക്ക് [ആർ പി എഫ്] റിക്രൂട്മെന്റ് നടത്തുന്നു. കോൺസ്റ്റബിൾമാരുടെ 8619 ഒഴിവുകളിലേക്കും സബ് ഇൻസ്പെക്ടർമാരുടെ 1120 ഒഴിവുകളിലേക്കുമാണ് ചൊവ്വാഴ്ച അപേക്ഷ ക്ഷണിച്ചത്. കോൺസ്റ്റബിൾമാരുടെ ഒഴിവുകളിൽ 4216 എണ്ണം വനിതകൾക്കാണ്. വനിതാ സബ് ഇൻസ്പെക്ടർമാരായി 301 പേരെയും വേണം.

എംപ്ലോയ്‌മെന്റ് ന്യൂസിന്റെ മെയ് 19 -25 ലക്കത്തിൽ വിശദാംശങ്ങൾ ഉണ്ടെന്ന് റെയിൽവേ പത്രക്കുറിപ്പിൽ അറിയിച്ചു. ഇന്ത്യൻ റെയിൽവേ വെബ് സൈറ്റിൽ നിന്നും വിവരങ്ങൾ അറിയാം. ഓൺലൈൻ ആയാണ് അപേക്ഷ സമർപ്പിക്കേണ്ടത്. ഒഴിവുകളെ കുറിച്ച് റെയിൽവേ മന്ത്രി പിയുഷ് ഗോയൽ ഒരു ട്വീറ്റ് പുറത്തു വിട്ടിട്ടുണ്ട്.

അതിനിടെ, ഇന്ത്യൻ റെയിൽവേ കാറ്ററിംഗ് ആൻഡ് ടൂറിസം കോർപറേഷന്റെ [ഐ ആർ സി ടി സി ] പേരിൽ ജോലി തട്ടിപ്പ് നടക്കുന്നതിനെതിരെ മുന്നറിയിപ്പ് പുറപ്പെടുവിച്ചിട്ടുണ്ട്. റയിൽവെയുടെ ഓൺ ലൈൻ ടിക്കറ്റ് ബുക്കിങ് വിഭാഗമാണ് ഐ ആർ സി ടി സി. റിക്രൂട്മെന്റ് സംബന്ധിച്ച ഒരു ചുമതലയും ഇവർക്കില്ലെന്ന് അറിയിച്ചിട്ടുണ്ട്. ഐ ആർ സി ടി സിക്ക് പ്രത്യേകമായി ഒരു റിക്രൂട്മെന്റ് ഡ്രൈവും പ്രഖ്യാപിച്ചിട്ടില്ലെന്നും പത്രക്കുറിപ്പ് വ്യക്തമാക്കുന്നു. കോർപറേഷന്റെ പേരിൽ പലരും തട്ടിപ്പിന് ഇരയായ പശ്ചാത്തലത്തിലാണ് ഈ മുന്നറിയിപ്പ്.