മധ്യപ്രദേശില്‍ സൂക്ഷിച്ചിരുന്ന മഹാത്മാ ഗാന്ധിയുടെ ചിതാഭസ്മം മോഷ്ടിക്കപ്പെട്ടു

മധ്യപ്രദേശിലെ റേവയിലുള്ള ഗാന്ധി ഭവനില്‍ സൂക്ഷിച്ചിരുന്ന മഹാത്മാ ഗാന്ധിയുടെ ചിതാഭസ്മം മോഷ്ടിക്കപ്പെട്ടു. ഇതിന് പുറമെ ഗാന്ധി ഭവന് പുറത്തെ പോസ്റ്ററില്‍ 'രാജ്യദ്രോഹി' എന്നെഴുതുകയും ചെയ്തു. മഹാത്മാ ഗാന്ധിയുടെ 150-ാം ജന്മ വാര്‍ഷികം ആചരിക്കുമ്പോഴാണ് ഇത്തരത്തിലൊരു സംഭവം.

ഗാന്ധി സ്മാരകത്തില്‍ ആദരമര്‍പ്പിക്കാനെത്തിയ റേവ ജില്ലാ കോണ്‍ഗ്രസ് പ്രസിഡന്റ് ഗുര്‍മീത് സിംഗും സഹപ്രവര്‍ത്തകരുമാണ് സംഭവം ആദ്യം കണ്ടത്. തുടര്‍ന്ന് പൊലീസില്‍ വിവരമറിയിക്കുകയായിരുന്നു. ഐപിസി 153 ബി, 504, 505 വകുപ്പുകള്‍ പ്രകാരം കേസെടുത്തിട്ടുണ്ട്. ഗാന്ധി ഭവനിലെ സിസിടിവി ദൃശ്യങ്ങള്‍ പൊലീസ് പരിശോധിച്ചു വരികയാണ്.