ഇതര നെറ്റ്വര്ക്കിലേക്കുള്ള കോളുകള്ക്ക് ഇനി മുതല് മിനിട്ടിന് ആറു പൈസ നിരക്കില് ചാര്ജ് ഈടാക്കുമെന്ന ജിയോയുടെ പ്രഖ്യാപനം രാജ്യത്ത് വലിയ പ്രതിഷേധങ്ങള്ക്കാണ് വഴിതെളിച്ചത്. ജിയോ ഫ്രീ കോളുകള് നിര്ത്തലാക്കുന്നു എന്ന വാര്ത്തകളെ ജിയോ ഔദ്യോഗികമായി ശരിവെക്കുകയും ചെയ്തു. ഇതോടെ ബോയ്കോട്ട് ജിയോ എന്ന ഹാഷ് ടാഗ് ട്വിറ്റര് ട്രെന്ഡിംഗ് ആയതു മുതല് കൂട്ടമായി പോര്ട്ട് ചെയ്യുന്നതും വരെയെത്തി കാര്യങ്ങള്. ജിയോയുടെ പ്രഖ്യാപനം മറ്റു കമ്പനികള് നനഞ്ഞിടം കുഴിക്കാനുള്ള അവസരമാക്കുകയും ചെയ്തു. ഇതിനിടെയാണ് പ്രതിഷേധം തണുപ്പിക്കാന് പുതിയ നീക്കവുമായി ജിയോ രംഗത്തെത്തിയത്.
ഉപഭോക്താക്കള്ക്ക് മുപ്പതു മിനിട്ട് സൗജന്യ ടോക്ക്ടൈമാണ് ജിയോയുടെ പുതിയ ഓഫര്. പുതിയ പ്ലാനിനു ശേഷമുള്ള ആദ്യ റീചാര്ജില് ഈ ഓഫര് ലഭ്യമാവുമെന്നാണ് വിവരം. ഏഴ് ദിവസത്തേക്കുള്ള ഓഫര് ഈ ഒരു തവണ മാത്രമേ ഉണ്ടാവൂ.
ഐയുസി അഥവാ ഇന്റര് കണക്ട് യുസേജ് ചാര്ജ് കവര് ചെയ്യാനാണ് നിലവില് ഉപഭോക്താക്കളില് നിന്നും ജിയോ ഔട്ട്ഗോയിംഗ് കോളുകള്ക്ക് പണം ഈടാക്കുന്നത്. മിനിട്ടിന് ആറു പൈസയാണ് കോള് നിരക്ക്. ഒരു ഓപ്പറേറ്ററില് നിന്ന് മറ്റൊരു ഓപ്പറേറ്റിലേക്ക് വോയ്സ് കോള് ചെയ്യുമ്പോള് ഈടാക്കുന്ന തുകയാണ് ഐയുസി. ട്രായ് ആണ് ഐയുസി നിശ്ചയിക്കുന്നത്. മിനിറ്റിന് 6 പൈസയാണ് നിലവില് നിശ്ചയിച്ചിരിക്കുന്ന ഐയുസി. ഔട്ട്ഗോയിംഗ് കോളുകള്ക്കായി ഒരു ഓപറേറ്റര് മറ്റൊരു ഓപറേറ്റര്ക്ക് ഐയുസി ചാര്ജ് നല്കണം. അതുപൊലെ തന്നെ ഇന്കമിംഗ് കോളുകള്ക്ക് കോള് ലഭിക്കുന്ന ഓപറേറ്റര്ക്ക് പണം ലഭിക്കും.
0 Comments:
ഒരു അഭിപ്രായം പോസ്റ്റ് ചെയ്യൂ