കാഞ്ഞങ്ങാട് :കോവിഡ് രോഗവ്യാപനം നഗരസഭയിൽ വർദ്ധിക്കുന്ന സാഹചര്യത്തിൽ, നഗരസഭാ പരിധിയിൽ സമ്പൂർണ്ണ ലോക്ക് ഡൗൺ അനിവാര്യമാണെന്ന് നഗരസഭയിൽ വിളിച്ചു ചേർത്ത വിവിധ സംഘടനാ ഭാരവാഹികളുടെ യോഗത്തിൽ ചെയർമാൻ നിർദ്ദേശിച്ചു.
കാഞ്ഞങ്ങാട് നഗരസഭ പരിധിയിൽ മാത്രം ലോക്ക് ഡൗൺ പ്രഖ്യാപിക്കുന്നത് കൊണ്ട് കോവിഡ് രോഗവ്യാപനം തടയാൻ സാധ്യമല്ലെന്നും, പകരം കോവിഡ് പ്രോട്ടോക്കോൾ കൃത്യമായി കാഞ്ഞങ്ങാട്ടെ വ്യാപാര സ്ഥാപനങ്ങൾ പാലിക്കുന്നതാണെന്നും യോഗത്തിൽ സംഘടനാ പ്രതിനിധികൾ യോഗത്തിൽ അവതരിപ്പിച്ചതിനെ തുടർന്ന് താഴെ പറയുന്ന തീരുമാനങ്ങൾ എടുത്തു.
1),എല്ലാ വ്യാപാര സ്ഥാപനങ്ങളിലും സാനിറ്റൈസർ നിർബന്ധമായും വെക്കണം. സോപ്പ് വെള്ളം, ബക്കറ്റ്, പാട്ട എന്നിവ പാടില്ല.
2) മാസ്ക്ക്, ഗ്ലൗസ് എന്നിവ ഉപയോഗിക്കണം
3) സാമൂഹിക അകലം നിർബന്ധമായും പാലിക്കണം. ആളുകൾ കൂട്ടം കൂടരുത്.
4) തെരുവോര കച്ചവടം പൂർണ്ണമായും നാളെ മുതൽ നിരോധിക്കും.
5) മേൽ തീരുമാനങ്ങൾ നടപ്പാക്കുന്നുവെന്ന് ഉറപ്പ് വരുത്താനായി നാളെ മുതൽ പരിശോധന ശക്തമാക്കുന്നതും, വീഴ്ച വരുത്തുന്നവർക്കെതിരെ കർശന നടപടികൾ സ്വീകരിക്കുന്നതുമാണ്.
യോഗത്തിൽ കേരള വ്യാപാരി വ്യവസായി ഏകോപന സമിതി പ്രതിനിധീകരിച്ച് ജില്ലാ സെക്രട്ടറി സുബൈർ ബല്ല, മേഖലാ ജനറൽ സെക്രട്ടറി കെ.ജി.പ്രഭാകരൻ, യൂണിറ്റ് പ്രസിഡണ്ടുമാരായ സി.യൂസഫ് ഹാജി, എൻ.പി.അഷറഫ്, രാമചന്ദ്രൻ തോ യമ്മൽ, മുഹമ്മദ് കല്ലുരാവി, സി.എ പീറ്റർ, വിനോദ് , നഗരസഭാ സെക്രട്ടറി ഗിരീഷ്, റവന്യൂ ഉദ്യോഗസ്ഥർ, കേരള വ്യാപാരി സമിതി ഭാരവാഹികൾ എന്നിവർ സംസാരിച്ചു.
