കെട്ടിട നിർമ്മാണ പെർമിറ്റ് ഫീസ് കുറയ്ക്കാൻ സി.പി.എം നിർദ്ദേശം

തിരുവനന്തപുരം: തദ്ദേശസ്വയംഭരണ സ്ഥാപനങ്ങൾക്ക് കീഴിലെ കെട്ടിടനിർമ്മാണ പെർമിറ്റ് ഫീസ് കൂട്ടിയതിൽ പ്രതിഷേധം ശക്തമായ സാഹചര്യത്തിൽ ഇത് കുറയ്ക്കാൻ സി.പി.എം സംസ്ഥാനസമിതി സർക്കാരിനോട് നിർദ്ദേശിച്ചു. ഇന്നലത്തെ സംസ്ഥാനസമിതി യോഗത്തിൽ വിഷയം ചർച്ചയായി. വർദ്ധന ജനങ്ങൾക്കിടയിൽ വലിയ പ്രതിഷേധത്തിനിടയാക്കിയതായും തിരിച്ചടിയാകുമെന്ന ആശങ്കയുണ്ടെന്നും ചിലർ അഭിപ്രായപ്പെട്ടു. ഈ പശ്ചാത്തലത്തിലാണ് തിരുത്തലിന് സർക്കാരിനോട് നിർദ്ദേശിക്കണമെന്ന ധാരണയുണ്ടായതെന്നറിയുന്നു. പുതിയ പരിഷ്കരണമനുസരിച്ച് 861.7 ചതുരശ്ര അടി വരെയുള്ള കെട്ടിടങ്ങൾക്ക് ഫീസിൽ മാറ്റം വരുത്തിയിട്ടില്ല. 861 ചതുരശ്ര അടി വരെയുള്ള കെട്ടിടങ്ങൾക്ക് മാറ്റമില്ലാത്തതിനാൽ സാധാരണ ജനങ്ങളെ ബാധിക്കില്ലെന്നായിരുന്നു സർക്കാർ വിശദീകരിച്ചിരുന്നത്.