മലപ്പുറം: പുളിക്കൽ പഞ്ചായത്ത് ഓഫീസിനു മുന്നിൽ പ്രതിഷേധത്തിന്‍റെ ഭാഗമായി ഒരാൾ തൂങ്ങി മരിച്ചു. കലാകാരനും സാമൂഹ്യ പ്രവർത്തകനുമായ റസാഖ് പയമ്പ്രാട്ടിനെയാണ് തൂങ്ങി മരിച്ച നിലയിൽ കണ്ടെത്തിയത്. ഇദ്ദേഹവും പഞ്ചായത്തും കഴിഞ്ഞ കുറെ നാളായി വലിയ രീതിയിലുള്ള പോരാണ് തുടരുന്നത്. ഈ പ്രതിഷേധത്തിന്‍റെ ഭാഗമായാണ് റസാഖിനെ മരണത്തിലേക്ക് നയിച്ചത് എന്നാണ് പ്രാഥമിക നിഗമനം.
പുളിക്കൽ പഞ്ചായത്തിലെ സ്വകാര്യ വ്യക്തിയുടെ മാലിന്യ പ്ലാന്‍റുമായി ബന്ധപ്പെട്ട് കഴിഞ്ഞ കുറെ നാളുകളായി റസാഖ് വലിയ പ്രതിഷേധങ്ങളുമായി രംഗത്തെത്തിയിരുന്നു. സംഭവത്തിൽ നിരവധി തവണ മാലിന്യ പ്ലാന്‍റിനെതിരെ പുളിക്കൽ പഞ്ചായത്തിന് ഇയാൾ പരാതി നൽകുകയും ചെയ്തിരുന്നു. എന്നാൽ, ഇത്ര ദിവസമായിട്ടും സംഭവത്തിൽ പരിശോധന നടത്തി നടപടിയെടുക്കാൻ അധികൃതർ തയ്യാറായില്ല. ഇതിന് പിന്നാലെയാണ് പ്രതിഷേധത്തിന്‍റെ ഭാഗമായി ഇയാൾ പഞ്ചായത്തിന് മുന്നിൽ ഇന്ന് രാവിലെ തൂങ്ങി മരിച്ചത് എന്നാണ് ഇപ്പോൾ പുറത്തുവരുന്ന വിവരം.
ഇദ്ദേഹത്തിന്‍റെ മൃതദേഹത്തിൽ പ്രതിഷേധത്തിന്‍റെ ഭാഗമായുള്ള ഫയലുകളും ഉണ്ടായിരുന്നു. സംഭവത്തിന്‍റെ കൂടുതൽ വിവരങ്ങൾ ഒന്നും ഇതുവരെ പുറത്തു വന്നിട്ടില്ല. അദ്ദേഹത്തിന്‍റെ മരണ വാർത്ത പുറത്തുവന്നതോടെ നിരവധി പേരാണ് പഞ്ചായത്ത് ഓഫീസിനു മുമ്പിൽ തടിച്ചു കൂടിയത്. സംഭവ സ്ഥലത്ത് കൊണ്ടോട്ടി പോലീസ് തുടർനടപടികൾ ആരംഭിച്ചിട്ടുണ്ട്.
0 Comments