മുള്ളേരിയയിൽ ദേശീയ പതാക താഴ്ത്തുന്നതിനിടെ പള്ളി വികാരി ഷോക്കേറ്റ് മരിച്ചു

കാസർകോട്: ദേശീയ പതാക താഴ്ത്തുന്നതിനിടെ പള്ളി വികാരി ഷോക്കേറ്റ് മരിച്ചു. ഒപ്പം ഉണ്ടായിരുന്ന വികാരിക്ക് പരിക്കേറ്റു. മുള്ളേരിയ ഇൻഫൻ്റ് സെന്റ് ജീസസ് ചർച്ചിലെ വികാരി റവ. ഫാ. മാത്യു കുടിലിൽ ( ഷിൻസ് -30) ആണ് മരിച്ചത്. ഒപ്പം ഉണ്ടായിരുന്ന വികാരി ഫാ. സെബിൻ ജോസഫി (29)നെ ഗുരുതരമായ നിലയിൽ ആശുപത്രിയിൽ പ്രവേശിപ്പിച്ചു. വ്യാഴാഴ്‌ച വൈകിട്ട് ആറുമണിയോടെയാണ് സംഭവം. ദേലംപാടി സെന്റ് മേരീസ് ചർച്ചിലെ വികാരി കൂടിയാണ് ഷിൻസ്. കുർബാന കഴിഞ്ഞ് വൈകിട്ട് ആറുമണിയോടെ മുള്ളേരിയ ചർച്ചിൽ എത്തി ദേശീയ പതാക താഴ്ത്തുന്നതിനിടെ ഫ്ലാഗ് പോസ്റ്റിൽ പതാക കുടങ്ങി. തുടർന്ന് ദേശീയ പതാക കെട്ടിയ ഇരുമ്പ് പൈപ്പ് ഇരുവരും ചേർന്ന് ഉയർത്തുന്നതിനിടെ എച്ച്‌ടി ലൈനിൽ സ്പ‌ർശിക്കുകയായിരുന്നു. ഷോക്കേറ്റ് ഫാ. സെബിൻ ജോസഫ് തെറിച്ച് വീണു. ഇരുമ്പ് പൈപ്പ് മാത്യുവിൻ്റെ കൈകളിൽ തന്നെയായിരുന്നു. ഉടൻ ചർച്ചിൽ എത്തിയവർ ഇരുവരെയും മുള്ളേരിയിലെ സഹകരണ ആശുപത്രിയിൽ എത്തിച്ചുവെങ്കിലും ഫാ. മാത്യു മരണപ്പെട്ടിരുന്നു. മൃതദേഹം കാസർകോട് ജനറൽ ആശുപത്രി മോർച്ചറിയിലേക്ക് മാറ്റും. കണ്ണൂർ ഇരിട്ടി എടൂർ സ്വദേശിയായ സ്വദേശിയായ ഷിൻസ് എംബിഎ വിദ്യാർത്ഥി കൂടിയാണ്.