കോഴിക്കോട് മെഡിക്കല്‍ കോളേജില്‍ സേവനമനുഷ്ഠിക്കാന്‍ തന്നെ അനുവദിക്കണമെന്നു മുഖ്യമന്ത്രി പിണറായി വിജയനോട് അഭ്യര്‍ത്ഥിച്ചുകൊണ്ട് ഡോ കഫീല്‍ മറ്റൊരു കുറിപ്പും ഫെയ്‌സ്ബുക്കില്‍ പോസ്റ്റ് ചെയ്തു. ഫജര്‍ നമസ്‌കാരത്തിനു ശേഷം ഉറങ്ങാന്‍ ശ്രമിച്ചിട്ടും സാധിക്കുന്നില്ല. നിപ്പാ വൈറസ് മൂലമുള്ള മരണങ്ങള്‍ എന്നെ വേട്ടയാടുന്നു. സിസ്റ്റര്‍ ലിനി പ്രചോദനമാണ്. എന്റെ ജീവിതം സേവനത്തിനു വേണ്ടി മാറ്റി വെക്കാന്‍ തയാറാണ്. അതിന് അല്ലാഹു അറിവും കരുത്തും നല്‍കട്ടെ എന്നും കഫീല്‍ ഖാന്‍ ഫേസ്ബുക്കില്‍ കുറിച്ചു. ഉത്തര്‍ പ്രദേശിലെ ഗൊരഖ്പൂര്‍ മെഡിക്കല്‍ കോളജില്‍ ഒാക്സിജന്‍ കിട്ടാതെ 60 ല്‍ അധികം കുട്ടികള്‍ മരിച്ചതിനെ തുടര്‍ന്ന് ഡോ കഫീല്‍ ഖാനെ കള്ളക്കേസില്‍ കുടുക്കി യോഗി സര്‍ക്കാര്‍ ജയിലിലടക്കുകയായിരുന്നു. പിന്നീട് ആറുമാസത്തിന് ശേഷമാണ് അദ്ദേഹത്തിന് ജാമ്യം കിട്ടിയത്.19 തവണ താന്‍ ആശുപത്രിയില്‍ ഓക്‌സിജന്‍ വിതരണം നിലയ്ക്കുമെന്ന കാര്യം അറിയിച്ചിട്ടും നടപടിയെടുക്കാതെ മാറിനിന്ന സര്‍ക്കാര്‍ പിന്നീട് ദുരന്തം സംഭവിച്ചപ്പോള്‍ കലീഫ് ഖാനെ ബലികൊടുത്ത് കൈകഴുകുകയായിരുന്നു.
അധികം വൈകാതെ മുഖ്യമന്ത്രി ആ പോസ്റ്റിന് മറുപടിയും നല്‍കി. ഡോ. കഫീല്‍ ഖാനെപ്പോലെയുള്ളവര്‍ക്ക് കേരളത്തില്‍ പ്രവര്‍ത്തിക്കാന്‍ അവസരം നല്‍കുന്നതില്‍ സര്‍ക്കാരിന് സന്തോഷമേയുള്ളൂ. അങ്ങനെയുള്ള ഡോക്ടര്‍മാരും വിദഗ്ധരും ആരോഗ്യവകുപ്പ് ഡയറക്ടറുമായോ കോഴിക്കോട് മെഡിക്കല്‍ കോളജ് ആശുപത്രി സൂപ്രണ്ടുമായോ ബന്ധപ്പെടണമെന്ന് അഭ്യര്‍ത്ഥിക്കുന്നുവെന്ന് പിണറായി വിജയന്‍ പറഞ്ഞു.
”വൈദ്യശാസ്ത്രരംഗത്ത് സ്വന്തം ആരോഗ്യമോ ജീവന്‍ പോലുമോ പരിഗണിക്കാതെ അര്‍പ്പണബോധത്തോടെ സേവനമനുഷ്ഠിക്കുന്ന ധാരാളം ഡോക്ടര്‍മാരുണ്ട്. അവരില്‍ ഒരാളായാണ് ഞാന്‍ ഡോ. കഫീല്‍ഖാനെയും കാണുന്നത്. സഹജീവികളോടുള്ള സ്‌നേഹമാണ് അവര്‍ക്ക് എല്ലാറ്റിലും വലുത്.” മുഖ്യമന്ത്രി ഫെയ്‌സ്ബുക്കില്‍ കുറിച്ചു.
0 Comments