കൊച്ചിയിലെ റോഡുകളുടെ ശോചനീയാവസ്ഥയ്‌ക്കെതിരെ വേറിട്ട പ്രതിഷേധവുമായി ഒരു ഫോട്ടോഷൂട്ട്. പൊട്ടിപ്പൊളിഞ്ഞ റോഡില്‍ അത്തപ്പൂക്കളമിടുന്ന ഒരു സുന്ദരിയുടെ ഫോട്ടോഷൂട്ടാണ് സോഷ്യല്‍ മീഡിയയില്‍ വൈറലായിരിക്കുന്നത്. ഫോട്ടോഗ്രാഫര്‍ അനുലാലാണ് വ്യത്യസ്തമായ ഈ ആശയത്തിന് പിന്നില്‍. മോഡല്‍ നിയ ശങ്കരത്തിലാണ് ഫോട്ടോയ്ക്ക് പോസ് ചെയ്തിരിക്കുന്നത്.
കൊച്ചിയിലെ റോഡുകളുടെ ശോചനീയാവസ്ഥയ്‌ക്കെതിരെ കടുത്ത പ്രതിഷേധമാണ് നടക്കുന്നത്. കഴിഞ്ഞ ദിവസമാണ് കൊച്ചിയിലെ റോഡുകള്‍ നന്നാക്കാത്തതിന് ഹൈക്കോടതി സര്‍ക്കാരിനെതിരെ സ്വമേധയാ കേസെടുത്തത്. അടുത്തിടെ റോഡിലെ കുഴിയില്‍ വീണു പരിക്ക് പറ്റിയ യുവാവ് അവിടെയിരുന്നു തന്നെ പ്രതിഷേധിക്കുന്ന ചിത്രവും വൈറലായിരുന്നു.
പനമ്പിള്ളി നഗറില്‍ ഇന്നലെ വൈകിട്ടായിരുന്നു ഫോട്ടോഷൂട്ട് നടന്നത്. ഫോട്ടോഗ്രാഫറായ അനുലാല്‍ ഈ ആശയം പങ്കു വെച്ചപ്പോള്‍ കൊള്ളാമെന്നു തോന്നിയതു കൊണ്ടാണ് ഫോട്ടോഷൂട്ടില്‍ പങ്കെടുക്കാമെന്നു തീരുമാനിച്ചതെന്ന് മോഡല്‍ നിയ ട്വന്റിഫോര്‍ ന്യൂസിനോട് പറഞ്ഞു.
മൂന്നു വര്‍ഷത്തോളമായി മോഡലിംഗ് രംഗത്തുള്ള നിയ രണ്ട് തമിഴ് സിനിമകളില്‍ അഭിനയിച്ചിട്ടുണ്ട്. രണ്ടും ഉടന്‍ റിലീസാവും. ആദ്യമായി അഭിനയിക്കുന്ന മലയാള സിനിമ ഈ മാസാവസാനം ഷൂട്ട് തുടങ്ങുമെന്നും നിയ അറിയിച്ചു.
0 Comments