കുമ്പള: കുമ്പളയില്‍ കടകള്‍ കുത്തിതുറന്ന് വ്യാപക കവര്‍ച്ച.വ്യാഴാഴ്ച രാത്രി കുമ്പള ടൗണിലെ ആറ് കടകളില്‍ നിന്ന് പണവും സാധനങ്ങളും കൊളളയടിച്ചു. കുമ്പള പഴയ ജില്ലാ സഹകരണാശുപത്രിക്ക് സമീപത്തെ കെ പി മുനീറിന്റെ ഉടമസ്ഥതയില്‍ ടെമ്പിള്‍ ക്രോസ് റോഡില്‍ പ്രവര്‍ത്തിക്കുന്ന കുമ്പള മെഡിക്കല്‍ സ്റ്റോറിന്റെ ജനല്‍ കമ്പികള്‍ അടര്‍ത്തി മാറ്റി 2000 രൂപ മോഷ്ടിച്ചു. സി സി ടി വിയുടെ ക്യാമറ വയറുകള്‍ മുറിച്ചുമാറ്റിയ ശേഷമാണ് മോഷണം നടത്തിയത്. മരുന്നുകളും ഫയലുകളും വലിച്ചെറിഞ്ഞ് നശിപ്പിച്ച നിലയിലായിരുന്നു. സമീപത്തുള്ള കുമ്പള റെയില്‍വേ സ്റ്റേഷനടുത്ത അബ്ദുല്‍കരീമിന്റെ ഭാരത് കൂള്‍ഡ്രിംഗ്സ് സ്ഥാപനത്തിന്റെ ജനല്‍ കമ്പി തകര്‍ത്ത് ഇവിടെ നിന്നും 2000 രൂപ കവര്‍ന്നു. സുലൈമാന്‍ കരിവെള്ളൂരിന്റെ ഉടസ്ഥതയിലുള്ള ഫ്രണ്ട്ലൈന്‍ പ്രിന്റിംഗ് പ്രസിന്റെ ഷട്ടര്‍ തകര്‍ത്ത് പതിനായിരം രൂപയും കുമ്പള കുണ്ടങ്കാരടുക്കയിലെ നവീനിന്റെ ഉടമസ്ഥതയിലുള്ള ഇരുചക്രവാഹന ഗ്യാരേജിന്റെ ഷട്ടര്‍ ലോക്ക് തകര്‍ത്ത് ആയിരം രൂപയും കവര്‍ന്നു. കുമ്പള കൃഷ്ണ നഗറിലെ വസന്തന്റെ ഉടസ്ഥതയിലുള്ള ലക്ഷ്മി ബ്യൂട്ടി പാര്‍ലര്‍ സലൂണില്‍ നിന്ന് 2000 രൂപ കവര്‍ന്നു. ഷട്ടര്‍ തകര്‍ത്തായിരുന്നു ഇവിടേയും മോഷണം നടത്തിയത്. രാജേന്ദ്രന്റെ ഉടമസ്ഥതയിലുള്ള സലൂണില്‍ നിന്ന് 4000 രൂപ കവര്‍ന്നു. കവര്‍ച്ചയ്ക്ക് ശേഷം ഐമാസ്റ്റ് ലൈറ്റ് ഓണാക്കിയാണ് സംഘം തിരിച്ചുപോയത്. കുമ്പള പോലീസ് കേസെടുത്തു.
0 Comments