ഹൈടെക്കായി ജില്ലയിലെ വിദ്യാലയങ്ങള്‍ ജില്ലാതല പൂര്‍ത്തീകരണ പ്രഖ്യാപനം ജനുവരിയില്‍

കാസർകോട്: ഒരു വര്‍ഷത്തിനുള്ളില്‍ എട്ടു മുതല്‍ 12 വരെ ക്ലാസുകളുള്ള ജില്ലയിലെ 244 സ്‌കൂളുകള്‍ ഹൈടെക്കായി മാറി. ഇതില്‍ 182 സ്‌കൂളുകളും സര്‍ക്കാര്‍ വിദ്യാലയങ്ങളാണ്. പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി കേരള ഇന്‍ഫ്രാസ്ട്രക്ച്ചര്‍ ആന്റ് ടെക്‌നോളജി ഫോര്‍ എഡ്യുക്കേഷന്റെ (കൈറ്റ്) ആഭിമുഖ്യത്തിലാണ് ഹൈടെക് ലാബ്-ഹൈടെക് സ്‌കൂള്‍ പദ്ധതി നടപ്പാക്കുന്നത്. 2019 ജൂലൈയില്‍ ഉദ്ഘാടനം ചെയ്ത ഒന്നു മുതല്‍ ഏഴുവരെ ക്ലാസുകളില്‍ ഹൈടെക് സ്‌കൂളുകളും ഹൈടെക് ലാബുകളും സ്ഥാപിക്കുന്ന പദ്ധതിയുടെ ഭാഗമായി ജില്ലയിലെ 478       സ്‌കൂളുകളിലും  ഉപകരണ വിതരണം പൂര്‍ത്തിയായി. പദ്ധതിയുടെ ജില്ലാതല പൂര്‍ത്തീകരണ പ്രഖ്യാപനം 2020 ജനുവരിയില്‍ നടക്കും.

ജില്ലയിലെ വിദ്യാലയങ്ങളില്‍  വിതരണം ചെയ്തത്  
5533 ലാപ്‌ടോപ്പുകള്‍

  ഹൈടെക് ലാബ്-ഹൈടെക് സ്‌കൂള്‍ പദ്ധതിയുടെ ഭാഗമായി ജില്ലയിലെ ഒന്നു മുതല്‍ 12 വരെയുള്ള സര്‍ക്കാര്‍, എയ്ഡഡ് സ്‌കൂളുകളില്‍  5533 ലാപ്‌ടോപ്പുകളും, 4707 യു.എസ്.ബി സ്പീക്കറുകളും 3294 പ്രൊജക്ടറുകളും 2016 മൗണ്ടിംഗ് കിറ്റുകളും 1069 സ്‌ക്രീനുകളും വിതരണം ചെയ്തു കഴിഞ്ഞു. കിഫ്ബിയില്‍ നിന്ന് 27.94 കോടി രൂപയാണ് പദ്ധതിക്കായി ചിലവഴിച്ചത്. കുണ്ടംകുഴി ജി.എച്ച്.എസ്.എസ്, നായന്മാര്‍മൂല ടി.ഐ.എച്ച്.എസ്.എസ്,  ദുര്‍ഗ്ഗ എച്ച്.എസ്.എസ്, ചട്ടഞ്ചാല്‍  സി.എച്ച്.എസ്.എസ്, കുമ്പള  ജി.എച്ച്.എസ്.എസ്, ചായ്യോത്ത് ജി.എച്ച്. എസ്.എസ്. ചായ്യോത്ത് എന്നീ സ്‌കൂളുകളിലാണ് ഏറ്റവും കൂടുതല്‍ ഉപകരണങ്ങള്‍ വിതരണം ചെയ്തത്. ഹൈടെക് ഉപകരണങ്ങള്‍ ലഭ്യമാക്കിയിട്ടുള്ള സ്‌കൂളുകളുടെ മുഴുവന് വിശദാംശങ്ങളും 'സമേതം'പോര്‍ട്ടലിലൂടെ അറിയാം.
  ഹൈടെക് പദ്ധതിയുടെ ഭാഗമായി മുഴുവന്‍ അധ്യാപകര്‍ക്കും പ്രത്യേക ഐടി പരിശീലനം നല്കി. പാഠഭാഗങ്ങള്‍ ക്ലാസ്മുറിയില്‍ ഡിജിറ്റല്‍ സംവിധാന മുപയോഗിച്ച് ഫലപ്രദമായി വിനിമയം നടത്താനായി 'സമഗ്ര'പോര്‍ട്ടല്‍ സജ്ജമായി. ഇന്ത്യയിലെ കുട്ടികളുടെ ഏറ്റവും വലിയ ഐ.ടി കൂട്ടായ്മയായ 'ലിറ്റില്‍് കൈറ്റ്‌സ്'യൂണിറ്റുകള്‍ വഴി ജില്ലയില്‍ 119 സ്‌കൂളുകളില്‍  ഹൈടെക് സ്‌കൂള്‍ പ്രവര്‍ത്തനങ്ങളും  സജീവമാണ്. ഒരു ഡിവിഷനില്‍ ഏഴ് കുട്ടികളില് താഴെയുണ്ടായിരുന്ന ജില്ലയിലെ 11 സ്‌കൂളുകള്‍ക്കും ഉപകരണങ്ങള്‍ എത്തിക്കാന്‍ സര്‍ക്കാര്‍ ഭരണാനുമതി നല്കിയതായി പൊതുവിദ്യാഭ്യാസ വകുപ്പ് മന്ത്രി പ്രൊഫ. സി. രവീന്ദ്രനാഥ് അറിയിച്ചു.