കാഞ്ഞങ്ങാട്: കാഞ്ഞങ്ങാട് സംയുക്ത മുസ്ലിം ജമാഅത്ത് കമ്മിറ്റിക്ക് രണ്ട് പതിറ്റാണ്ട് കാലത്തിലധികം സ്തുത്യർഹമായ നേതൃത്വം നൽകി കാലയവനികയിൽ മറഞ്ഞ മെട്രോ മുഹമ്മദ് ഹാജി യുടെ സ്മരണാർത്ഥം സംയുക്ത ജമാഅത്ത് സെന്ററിന് മെട്രോ മുഹമ്മദ് ഹാജി സ്മാരക സംയുക്ത ജമാഅത്ത് സെൻറർ എന്ന് നാമകരണം ചെയ്യാൻ വൈസ് പ്രസിഡണ്ട് ഹമീദ് ഹാജിയുടെ അധ്യക്ഷതയിൽ ചേർന്ന സംയുക്ത ജമാഅത്ത് ഭാരവാഹികളുടെ യോഗം തീരുമാനിച്ചു. 26ന് വെള്ളിയാഴ്ച ജുമുഅ നമസ്കാരാനന്തരം സംയുക്ത മുസ്ലിം ജമാഅത്തിന് കീഴിലുള്ള എല്ലാ പള്ളികളിലും ദിക്റ് ദുആ മജ്ലിസ് സംഘടിപ്പിക്കും. മെട്രോ മുഹമ്മദ് ഹാജി ശക്തമായി പിൻബലമേകി ഒരു ദശാബ്ദം പൂർത്തിയാക്കുന്ന ശിഹാബ് തങ്ങൾ മംഗല്യ നിധിയുടെ സഹായം അദ്ദേഹത്തോടുള്ള ബഹുമാനസൂചകമായി ഈ വർഷം 25000 രൂപ വർധിപ്പിച്ച് 125000 രൂപയായി ഉയർത്തി നൽകും. സംയുക്ത ജമാഅത്ത് പ്രസിഡന്റിന്റെ താൽക്കാലിക ചുമതല വൈസ് പ്രസിഡണ്ട് എ ഹമീദ് ഹാജിക്ക് നൽകി. മെട്രോ മുഹമ്മദ് ഹാജി യുടെ മഗ്ഫിറത്തിന് വേണ്ടി എം മൊയ്തുമൗലവിയുടെ പ്രത്യേക പ്രാർത്ഥനയോടെ യോഗം ആരംഭിച്ചു. ബഷീർ വെള്ളിക്കോത്ത്, സി കുഞ്ഞമ്മദ് ഹാജി പാലക്കി, വി കെ അസീസ് മങ്കയം, വൺ ഫോർ അബ്ദുറഹ്മാൻ, മുബാറക് ഹസൈനാർ ഹാജി, ജാതിയിൽ ഹസൈനാർ, കെ യു ദാവൂദ് ഹാജി, ബഷീർ ആറങ്ങാടി എന്നിവർ സംബന്ധിച്ചു.
