രമേശ് ചെന്നിത്തല മുഖ്യമന്ത്രിയാകുമോ എന്ന ചോദ്യത്തിന് മുഖ്യമന്ത്രിയാകാൻ അദ്ദേഹം അർഹനാണെന്നാണ് ഉമ്മൻ ചാണ്ടി മറുപടി നൽകിയത്. അതേസമയം ഇക്കാര്യത്തിൽ തീരുമാനമെടുക്കേണ്ടത് കേന്ദ്ര നേതൃത്വമാണെന്നും അദ്ദേഹം വ്യക്തമാക്കി. തന്റെ നിയമസഭാ സ്ഥാനാർഥിത്വവും മുഖ്യമന്ത്രി സ്ഥാനാർഥിത്വവും തള്ളാതെയാണ് ഉമ്മൻ ചാണ്ടി സംസാരിച്ചതെന്നാണ് ഏഷ്യാനെറ്റ് ന്യൂസ് റിപ്പോർട്ട് ചെയ്യുന്നത്.
അടുത്ത നിയമസഭ തെരഞ്ഞെടുപ്പിൽ കോൺഗ്രസിന്റെ മുഖ്യമന്ത്രി സ്ഥാനാർഥി ആരാകുമെന്ന ചോദ്യം നേരത്തെ തന്നെ ഉയർന്നിട്ടുണ്ട്. ഉമ്മൻ ചാണ്ടി വീണ്ടും മുഖ്യമന്ത്രി സ്ഥാനാർഥിയാവുകയാണെങ്കിൽ രമേശ് ചെന്നിത്തല പക്ഷത്തിന്റെ പ്രതികരണം എന്തായിരിക്കുമെന്നും, ഇരുനേതാക്കളും അല്ലാതെ മറ്റാരെങ്കിലും ഈ സ്ഥാനത്തേക്ക് ഉയർന്നുവരുമോ എന്നതുമാണ് സംസ്ഥാന രാഷ്ട്രീയം ഉറ്റുനോക്കുന്നത്.
കോൺഗ്രസ് കേന്ദ്ര നേതൃത്വത്തിനെതിരായ കത്ത് വിവാദത്തിനോട് പ്രതികരിച്ച ഉമ്മൻ ചാണ്ടി കത്ത് എഴുതിയ നേതാക്കൾ കുറ്റക്കാരല്ലെന്നും പറഞ്ഞു. ചാരക്കേസ് വിവാദ സമയത്ത് കെ കരുണാകരനെ താൻ കുറ്റപ്പെടുത്തിയിട്ടില്ലെന്നും മുതിർന്ന കോൺഗ്രസ് നേതാവ് പ്രതികരിച്ചു.
