ഇന്ന് 'വ്യാഴവും' 'ശനിയും' ഒന്നിച്ച്; ആകാശത്തിലെ അത്ഭുത കാഴ്ച്ച കാണാം

ഇന്ന് ഡിസംബർ 21 ന് ആകാശത്ത് ഒരുങ്ങുന്നത് അത്ഭുത കാഴ്ച്ച. സൂര്യാസ്തമയം കഴിഞ്ഞ് പടിഞ്ഞാറു ഭാഗത്ത് ഗ്രഹങ്ങളായ വ്യാഴാവും ശനിയും ഒന്നിച്ച് നിൽക്കുന്നതായി കാണാം. ഒറ്റനോട്ടത്തിൽ ഒന്നിച്ചാണെന്ന് തോന്നുമെങ്കിലും രണ്ട് ഗ്രഹങ്ങളേയും രണ്ടായി കാണാൻ കഴിയൂ. അപൂർവമായി മാത്രം സംഭവിക്കുന്ന പ്രതിഭാസമാണിത്.

'ഗ്രേറ്റ് കൺജങ്ഷൻ' അഥവാ മഹാ സംയോജനം എന്നാണ് ഇത് അറിയപ്പെടുന്നത്. ഏകദേശം ഓരോ ഇരുപത് വർഷം കൂടുമ്പോഴും വ്യാഴവും ശനിയും ഈ രീതിയിൽ 'ഒന്നിക്കാറുണ്ട്''. ഇതിന് മുമ്പ് 2000 ലായിരുന്നു ഇത് സംഭവിച്ചത്. എന്നാൽ ഇത്രയും അടുത്ത് രണ്ട് ഗ്രഹങ്ങളേയും കാണുന്നത് നൂറ്റാണ്ടുകൾക്ക് ശേഷമാണ്. 1623 ലാണ് അവസാനമായി ഇരു ഗ്രഹങ്ങളും ഇത്രയും അടുത്ത് ചേർന്നത്.

മാസങ്ങളായി ഇരു ഗ്രഹങ്ങളും പരസ്പരം അടുത്തുകൊണ്ടിരിക്കുകയായിരുന്നു. ഇന്ത്യയിൽ വൈകിട്ട് 5.28 മുതൽ 7.12 വരെയാണ് മഹാസംഗമം നടക്കുക. ചക്രവാളത്തിന് അടുത്തായി തിളക്കം കൂടി നക്ഷത്രമായി വ്യാഴത്തിനെയും തൊട്ടുമുകളിൽ അൽപ്പം തെക്കുമാറി ശനിയേയും കാണാം. ആദ്യത്ത അരമണിക്കൂറാണ് അപൂർവ കാഴ്ച്ച ഏറ്റവും വ്യക്തമായി ദൃശ്യമാകുക. തുടർന്ന് രണ്ട് മണിക്കൂറോളം ഇവ ഇതേ രീതിയിൽ ഉണ്ടാകും.