ട്വൻ്റി 20 പഞ്ചായത്തുകൾ 'നിയന്ത്രിക്കുന്നത്' സാബു എം ജേക്കബ്; സെക്രട്ടറിമാരെ മാറ്റാനൊരുങ്ങി സര്‍ക്കാര്‍

 

കൊച്ചി: എറണാകുളം ജില്ലയിൽ നാല് പഞ്ചായത്തുകള്‍ ഭരിക്കുന്ന കിറ്റക്സ് ഗ്രൂപ്പിൻ്റെ നിയന്ത്രണത്തിലുള്ള ട്വൻ്റി 20യും സംസ്ഥാന സര്‍ക്കാരും പരസ്യമായി കൊമ്പുകോര്‍ക്കുന്നു. ട്വൻ്റി - 20ക്ക് അനുകൂലമായ നിലപാട് സ്വീകരിക്കുന്ന പഞ്ചായത്ത് സെക്രട്ടറിമാരെ സ്ഥലം മാറ്റാനാണ് സംസ്ഥാന സര്‍ക്കാര്‍ ഒരുങ്ങുന്നത്. കിറ്റക്സ് എംഡി സാബു എം ജേക്കബിന് നേരിട്ട് നിയന്ത്രണമുള്ള തരത്തിൽ പഞ്ചായത്തുകളിൽ ആസൂത്രണ സമിതി രൂപീകരിച്ചതിനു പിന്നാലെയാണ് സംസ്ഥാന സര്‍ക്കാരൻ്റെ നീക്കം.

കമ്പനി എംഡിയുടെ ഭരണത്തിന് തടയിടാൻ സര്‍ക്കാര്‍ തന്നെ നേരിട്ട് ഇടപെടുകയാണെന്നാണ് റിപ്പോര്‍ട്ടര്‍ ടിവി റിപ്പോര്‍ട്ട്. കിഴക്കമ്പലം പഞ്ചായത്തിനു പുറമെ ഈ തദ്ദേശ ഭരണ തെരഞ്ഞെടുപ്പിൽ സമീപ പഞ്ചായത്തുകളായ കുന്നത്തുനാട്, മഴുവന്നൂര്‍, ഐക്കരനാട് എന്നീ പഞ്ചായത്തുകളും ട്വൻ്റി 20 ഭരണം പിടിച്ചിരുന്നു. ട്വൻ്റി 20 ഭരിക്കുന്ന സ്ഥലങ്ങളിൽ പഞ്ചായത്ത് ഭരണത്തിൽ കമ്പനി നേരിട്ട് ഇടപെടുന്നുണ്ടെന്നും കമ്പനി ജനപ്രതിനിധികള്‍ക്ക് 'ശമ്പളം' കൊടുക്കുന്നുണ്ടെന്നും മുൻ പഞ്ചായത്ത് പ്രസിഡൻ്റഅ കെ വി ജേക്കബ് ആരോപിച്ചിരുന്നു. ഇത്തരത്തിൽ പഞ്ചായത്ത് പ്രസിഡൻ്റ്, വൈസ് പ്രസിഡൻ്റ്, മെമ്പര്‍മാര്‍ എന്നിവര്‍ സര്‍ക്കാര്‍ അലവൻസിനു പുറമെ എല്ലാ മാസവും കമ്പനിയിൽ നിന്ന് നിയമവിരുദ്ധമായി പണം കൈപ്പറ്റുന്നുണ്ടെന്നും ആരോപണമുയര്‍ന്നിരുന്നു.

ട്വൻ്റി 20 ഭരിക്കുന്ന മഴുവന്നൂര്‍ പഞ്ചായത്തിൽ പാര്‍ട്ടിയ്ക്ക് 19 സീറ്റിലാണ് വിജയിച്ചത്. ഇവിടെ പഞ്ചായത്ത് ആസൂത്രണ സമിതിയുടെ അധ്യക്ഷൻ സാബു എം ജേക്കബ് തന്നെയാണ്. ഇദ്ദേഹത്തൻ്റെ സഹോദരനായ ബേബി എം ജേക്കബ്, മറ്റു ജില്ലക്കാരടക്കമുള്ള ബന്ധുക്കള്‍ എന്നിവരും സമിതിയിലുണ്ട്. ഇതിനെതിരെ പ്രതിപക്ഷം ശക്തമായ പ്രതിഷേധം ഉന്നയിക്കുകയും ചെയ്തിരുന്നു.