LATEST UPDATES

6/recent/ticker-posts

യൂട്യൂബർമാർക്ക് എട്ടിന്റെ പണി! നികുതി ഈടാക്കാൻ ഗൂഗിൾ

 

യൂട്യൂബർമാർ തഴച്ചുവളർന്ന ഒരു കാലഘട്ടമായിരുന്നു കൊവിഡ്-19 മഹാമാരിയെ തുടർന്നുണ്ടായ ലോക്ക് ഡൗൺ സമയം. വീട്ടിലിരിക്കാൻ നിർബന്ധിതരായതോടെ പലരും സ്വന്തമായി യൂട്യൂബ് ചാനൽ തുടങ്ങി. മുമ്പേ തന്നെ യൂട്യൂബ് ചാനൽ ഉള്ളവർക്ക് കൂടുതൽ വിഡിയോകൾ തയ്യാറാക്കാൻ സമയം കിട്ടിയതോടെ വളർച്ച ത്വരിതഗതിയിലായി. യൂട്യൂബിലൂടെ വരുമാനം നേടുക എന്നുള്ളത് പലരും സ്വപ്നം കാണാനും ചിലർക്ക് സാധ്യമാക്കാനും സാധിച്ച മാസങ്ങളാണ് കഴിഞ്ഞു പോയത്. എന്നാൽ യൂട്യൂബർമാരുടെ വരുമാനത്തെ ബാധിക്കുന്ന ഒരു തീരുമാനവുമായി മുന്നോട്ട് പോവാൻ നിർബന്ധിതരായിരിക്കുകയാണ് മാതൃ കമ്പനിയായ ഗൂഗിൾ.


അമേരിക്കയ്ക്ക് പുറത്തെ യൂട്യൂബ് കണ്ടന്റ് ക്രിയേറ്റർമാരിൽ നിന്നും യുഎസ് ടാക്‌സ് അധികം താമസമില്ലാതെ ഗൂഗിൾ പിരിക്കും. ജൂൺ മുതലാണ് ഈ നികുതി പിരിക്കാൻ ആരംഭിക്കുക. ഇതിന് മുന്നോടിയായി കണ്ടന്റ് ക്രിയേറ്റർമാർക്ക് ഗൂഗിൾ അയച്ച ഇമെയിലിൽ 'നികുതി കുറയ്ക്കുന്നതിനുള്ള ശരിയായ തുക നിർണ്ണയിക്കാൻ' ഓരോരുത്തരുടെയും നികുതി വിവരങ്ങൾ ആഡ്സെൻസിൽ സമർപ്പിക്കാൻ ആവശ്യപ്പടുന്നു. അമേരിക്കയ്ക്ക് പുറത്തുള്ള ഇന്ത്യയടക്കമുള്ള ലോകത്തെ എല്ലാ യൂട്യൂബ് കണ്ടന്റ് ക്രിയേറ്റർമാർക്കും ഈ നിർദേശം ബാധകമാണ്.


"ഒരു നികുതിയിളവുകളും ബാധകമല്ലെങ്കിൽ യുഎസിലെ കാഴ്ചക്കാരിൽ നിന്നുള്ള പരസ്യ വരുമാനം, യൂട്യൂബ് പ്രീമിയം, സൂപ്പർ ചാറ്റ്, സൂപ്പർ സ്റ്റിക്കറുകൾ, ചാനൽ മെമ്പർഷിപ്പ് എന്നിവയിൽ നിന്നുള്ള ക്രിയേറ്റർമാരുടെ യൂട്യൂബ് വരുമാനത്തിന്റെ ഒരു ഭാഗം നികുതിയായി ഗൂഗിൾ തടഞ്ഞുവയ്ക്കും," ഗൂഗിൾ വ്യക്തമാക്കി.


ശരിയായ ടാക്സ് ഫോം സമർപ്പിച്ചാൽ (ആഡ്സെൻസിൽ ഓൺലൈൻ ആയി സമർപ്പിക്കാൻ) ആഡ്സെൻസിലെ പേയ്മെന്റ് സെക്ഷനിൽ നിങ്ങളുടെ ചാനലിന്റെ വരുമാനത്തിൽ നിന്നും എത്ര ശതമാനമാണ് നികുതിയായി പിടിക്കുക എന്ന് വ്യക്തമാവും. ഏകദേശം 15 ശതമാനം വരെയാണ് നികുതി. നിങ്ങളുടെ കണ്ടന്റിന്റെ അമേരിക്കയിൽ നിന്നുള്ള വ്യൂ അനുസരിച്ച് ഇതിൽ മാറ്റമുണ്ടാകും. അതായത് ഒരു മാസം 200 ഡോളറിന്റെ വരുമാനം അമേരിക്കൻ കാണികളുടെ വ്യൂസ് വഴി നിങ്ങളുടെ ചാനലിന് ലഭിച്ചാൽ 30 ഡോളർ വരെ നികുതിയിനത്തിൽ കുറയും.


അതെ സമയം ശരിയായ ടാക്സ് ഫോം മെയ് മാസം 31-ന് മുൻപായി സമർപ്പിച്ചില്ല എങ്കിൽ വരുമാനത്തിന്റെ 24 ശതമാനം വരെ നികുതിയായി കുറയ്ക്കും. ഇത് പക്ഷെ അമേരിക്കൻ കാണികളുടെ വ്യൂസ് മാത്രമല്ല നിങ്ങളുടെ ചാനലിന്റെ ലോകം മുഴുവനുമുള്ള വ്യൂസിൽ നിന്നുള്ള വരുമാനത്തിൽ നിന്നാണ് കുറയ്ക്കുക.


മാറ്റം വിശദീകരിക്കുന്നതിനും നികുതി വിവരങ്ങൾ നൽകാൻ ക്രിയേർമാരെ സഹായിക്കുന്നതിനും യൂട്യൂബ് തയ്യാറാക്കിയ വീഡിയോ ചുവടെ കാണാം.

Post a Comment

0 Comments