തെരുവ് നായ്ക്കളെ പീഡിപ്പിച്ചു; കച്ചവടക്കാരനായ 65കാരൻ അറസ്റ്റിൽ

 

മുംബൈ: നിരവധി തെരുവ് നായ്ക്കളെ പീഡനത്തിനിരയാക്കിയ 65കാരൻ അറസ്റ്റിൽ. മുംബൈയിലെ പച്ചക്കറി വിൽപ്പനക്കാരനായ അഹമ്മദ് ഷാഹി എന്നയാളാണ് അറസ്റ്റിലായത്. ഇയാൾ നായ്ക്കളെ പീഡിപ്പിക്കുന്ന ദൃശ്യങ്ങൾ പോലീസിന് കിട്ടിയിരുന്നെന്നാണ് ടൈംസ് നൗ റിപ്പോർട്ട് ചെയ്യുന്നത്.

ബോംബെ ആനിമൽ റൈറ്റ്സ് (BAR) എന്ന എൻജിഒ ആണ് അഹമ്മദ് ഷാഹി നായ്ക്കളെ പീഡിപ്പിക്കുന്ന വീഡിയോ സഹിതം പരാതിയുമായി പോലീസിനെ സമീപിച്ചത്. എൻജിഒ പ്രവർത്തകർ തന്നെയാണ് ഇയാൾ നായ്ക്കളെ പീഡിപ്പിക്കുന്ന ദൃശ്യങ്ങൾ പകർത്തിയത്. ഒറ്റപ്പെട്ട സ്ഥലത്ത് വെച്ചായിരുന്നു സംഭവമെന്നാണ് റിപ്പോർട്ട്.

"വീഡിയോ എനിക്ക് ലഭിച്ചതിന് പിന്നാലെ അന്ധേരിയിലെ ഡിഎൻ നഗർ പോലീസ് സ്റ്റേഷനിലെത്തി ഞാൻ പരാതി നൽകി. അഹമ്മദിനെ ചോദ്യം ചെയ്തപ്പോൾ, തന്റെ പ്രവർത്തിയിൽ അയാൾക്ക് തെല്ലും കുറ്റബോധം ഉണ്ടായിരുന്നില്ല. താൻ നായ്ക്കൾക്ക് ഭക്ഷണം നൽകാറുണ്ടെന്നും ചിലപ്പോൾ അവയുമായി സെക്സ് ചെയ്യാറുണ്ടെന്നുമാണ് അയാൾ പറഞ്ഞത്" എൻജിഒ സ്ഥാപകനായ വിജയ് മൊഹാനി പറഞ്ഞു.

തന്‍റെ പരാതിയുടെ അടിസ്ഥാനത്തിൽ ഉടൻ നടപടിയെടുത്ത പോലീസിന് മൊഹാനി നന്ദി പറഞ്ഞു. ഇയാൾ ഇതിനുമുമ്പും മറ്റ് മൃഗങ്ങളെ ക്രൂരതയ്ക്ക് ഇരയാക്കിയിട്ടുണ്ടാകുമെന്നാണ് എൻജിഒ പറയുന്നത്. കോടതിയിൽ ഹാജരാക്കിയ പ്രതിയെ രണ്ട് ദിവസത്തെ പോലീസ് കസ്റ്റഡിയിൽ വിട്ടിരിക്കുകയാണ്. പ്രകൃതിവിരുദ്ധ പീഡനം, മൃഗങ്ങളോടുള്ള ക്രൂരത, തുടങ്ങിയ കുറ്റങ്ങൾ ചുമത്തിയാണ് അഹമ്മദിനെതിരെ കേസെടുത്തിരിക്കുന്നത്. അന്ധേരിയിലെ ഗിൽബർട്ട് ഹിൽ ഏരിയയിലാണ് ഇയാൾ താമസിക്കുന്നത്.