കാഞ്ഞങ്ങാട്: പൂച്ചക്കാട്ടെ ഹോട്ടലില്‍ നിന്ന് വാങ്ങിയ ഷവര്‍മ്മ കഴിച്ച 14 കുട്ടികളെ ഭക്ഷ്യവിഷബാധയേറ്റ് ആസ്പത്രിയില്‍ പ്രവേശിപ്പിച്ചു. പൂച്ചക്കാട് സ്വദേശിനികളായ റിഫാ ഫാത്തിമ(16), ഫാത്തിമത്ത് സക്കിയ(13), നഫീസ മെഹ്‌സ (13), ഖദീജത്ത് സുല്‍ഫ(13), ഹിദ ഫാത്തിമ (14 ), ആയിഷത്ത് ഷിഫാന (13 ), ആയിഷത്ത് മെഹ്‌റ (13 ), നൂഹ (13 ), ഫാത്തിമത്ത് സഫ (15), ഖദീജത്ത് ശസ (15), സാറ സഹ്‌റ (13 ), റിൻസ (15), റിസ്‌വാൻ (8) എന്നിവരെയാണ് കാഞ്ഞങ്ങാട് മൻസൂർ ആശുപത്രിയിൽ പ്രവേശിപ്പിച്ചത്. കഴിഞ്ഞ ദിവസം രാത്രി പൂച്ചക്കാട്ടെ പള്ളിയില്‍ നടന്ന നബിദിനാഘോഷപരിപാടിക്കിടെ ഭക്ഷണം നല്‍കിയിരുന്നു. എന്നാല്‍ ഭക്ഷണം തികയാതെ വന്നതോടെ ബാക്കിയുള്ളവര്‍ക്ക് തൊട്ടടുത്തുള്ള ഹോട്ടലില്‍ നിന്ന് ഷവര്‍മ്മ വാങ്ങി നല്‍കി. ഷവര്‍മ്മ കഴിച്ചതോടെ പതിനഞ്ചോളം കുട്ടികള്‍ക്ക് ഛര്‍ദ്ദിയും തലകറക്കവും അനുഭവപ്പെടുകയായിരുന്നു. ഇതോടെ പഴകിയ ഷവര്‍മ്മയാണ് ഹോട്ടലില്‍ നിന്ന് നല്‍കിയതെന്ന പരാതി ഉയര്‍ന്നു. ആളുകള്‍ ഹോട്ടലിലെത്തി ബഹളമുണ്ടാക്കിയതോടെ ചെറിയ തോതില്‍ സംഘര്‍ഷാവസ്ഥയുണ്ടായി. വിവരമറിഞ്ഞ് ബേക്കല്‍ പൊലീസും സ്ഥലത്തെത്തി. സംഭവം സംബന്ധിച്ച് ആരോഗ്യവകുപ്പ് അന്വേഷണമാരംഭിച്ചു.
0 Comments