പാറപ്പള്ളി മുസ്ലിം ജമാഅത്ത് തർക്കം: ഹർജിക്കാരന് അനുകൂലമായി ഇടക്കാല ഉത്തരവ്; ജനറൽ ബോഡിയിലും മതചടങ്ങുകളിലും പങ്കെടുക്കുന്നത് തടയരുതെന്ന് കോടതി

കാഞ്ഞങ്ങാട്: പാറപ്പള്ളി  മുസ്ലിം ജമാഅത്ത് കമ്മിറ്റി അംഗത്വവുമായി ബന്ധപ്പെട്ട തർക്കത്തിൽ ഹൊസ്ദുർഗ് മുൻസിഫ് കോടതി ഹർജിക്കാരന് അനുകൂലമായി ഇടക്കാല ഉത്തരവ് പുറപ്പെടുവിച്ചു. കേസ് തീർപ്പാകുന്നതുവരെ ഹർജിക്കാരനായ പാറപ്പള്ളി  കുതിരുമ്മൽ ഹൗസിലെ മുസ്തഫ പി.യെ ജനറൽ ബോഡി യോഗങ്ങളിലും മതപരമായ ചടങ്ങുകളിലും ആചാരങ്ങളിലും പങ്കെടുക്കുന്നതിൽ നിന്ന് ജമാഅത്ത് കമ്മിറ്റി തടയരുതെന്ന് കോടതി നിർദേശിച്ചു.  ജൂനിയർ ഡിവിഷൻ സിവിൽ ജഡ്ജിയാണ്  ഹർജിയിൽ ഉത്തരവ് പുറപ്പെടുവിച്ചത്.  ഹർജിക്കാരൻ 40 വർഷത്തിലേറെയായി ജമാഅത്ത് അംഗമാണെന്നും, യാതൊരു നോട്ടീസോ വിശദീകരണം നൽകാനുള്ള അവസരമോ ലഭിക്കാതെയാണ് ജമാഅത്ത് നടപടിയെടുത്തതെന്നും ഹർജിയിൽ ആരോപിച്ചിരുന്നു. ഇതിലൂടെ സ്വാഭാവിക നീതിയുടെ  തത്വങ്ങൾ ലംഘിക്കപ്പെട്ടുവെന്നും അദ്ദേഹം കോടതിയെ അറിയിച്ചു.  അതേസമയം, ഹർജിക്കാരനെ പുറത്താക്കിയിട്ടില്ലെന്നും അന്വേഷണം പൂർത്തിയാകുന്നതുവരെ സസ്പെൻഡ് ചെയ്തതാണെന്നും ജമാഅത്ത് കമ്മിറ്റി കോടതിയിൽ വ്യക്തമാക്കി. ഉറൂസ് ആഘോഷത്തിനിടെ ഉണ്ടായ സംഭവങ്ങളുടെയും സ്ഥാപനത്തിന്റെ സമാധാനവും ഐക്യവും സംരക്ഷിക്കുന്നതിന്റെയും അടിസ്ഥാനത്തിലാണ് നടപടിയെന്നും കമ്മിറ്റി വാദിച്ചു.  ഇരുകക്ഷികളുടെയും വാദങ്ങൾ കേട്ട കോടതി, ഹർജിക്കാരനെതിരെ നടപടി സ്വീകരിക്കുന്നതിന് മുമ്പ് കേൾക്കാനുള്ള അവസരം നൽകിയതായി രേഖകളിൽ തെളിവില്ലെന്ന് നിരീക്ഷിച്ചു. സ്വാഭാവിക നീതിയുടെ തത്വങ്ങൾ പാലിക്കപ്പെട്ടിട്ടില്ലെന്ന് പ്രഥമദൃഷ്ട്യാ  ബോധ്യപ്പെട്ടതായും കോടതി വ്യക്തമാക്കി.  തുടർന്ന്, കേസ് അന്തിമമായി തീർപ്പാകുന്നതുവരെ 2026 ഏപ്രിൽ 21-ലെ ജമാഅത്ത് കമ്മിറ്റി തീരുമാനത്തിന്റെ അടിസ്ഥാനത്തിൽ ഹർജിക്കാരനെ ജനറൽ ബോഡി യോഗങ്ങൾ, മതപരമായ ചടങ്ങുകൾ, ആചാരങ്ങൾ എന്നിവയിൽ പങ്കെടുക്കുന്നതിൽ നിന്ന് തടയരുതെന്ന് കോടതി ഇടക്കാല നിരോധന ഉത്തരവ് പുറപ്പെടുവിച്ചു.