ഉപ്പള: മര്‍ദനത്തിനിരയായ വിദ്യാര്‍ഥിക്കെതിരെ അധ്യാപിക മഞ്ചേശ്വരം പോലീസില്‍ പരാതി നല്‍കി. അധ്യാപികക്കെതിരെ വിദ്യാര്‍ഥി പരാതി നല്‍കിയതിന് പിറകെയാണ് അധ്യാപിക പരാതി നല്‍കിയത്. വിദ്യാര്‍ഥിക്കെതിരെ കള്ളക്കേസെടുത്താല്‍ സ്‌കൂളിനെതിരെ സമരപരിപാടികളുമായി രംഗത്തിറങ്ങുമെന്ന് നാട്ടുകാര്‍ മുന്നറിയിപ്പ് നല്‍കി. രണ്ട് പരാതികളും സ്വീകരിച്ച മഞ്ചേശ്വരം പോലീസ് നടപടി സ്വീകരിക്കാനാവാതെ കുഴങ്ങുകയാണ്. ഉപ്പളയിലെ ഒരു സ്വകാര്യ ഇംഗ്ലീഷ് മീഡിയം സ്‌കൂളില്‍ കഴിഞ്ഞ ദിവസമായിരുന്നു സംഭവം. മറ്റൊരു വിദ്യാര്‍ഥിയെ ഇരട്ടപ്പേര് വിളിച്ചതിനെ ചൊല്ലി അധ്യാപിക വിദ്യാര്‍ഥിയെ മുടി പിടിച്ച് തല ചുമരില്‍ ഇടിച്ച് പരുക്കേല്‍പ്പിച്ചുവെന്നാണ് പോലീസില്‍ പരാതി ലഭിച്ചത്. ഇതേ തുടര്‍ന്ന് കവെള്ളിയാഴ്ച പോലീസ് സ്‌കൂളിലെത്തി സി സി ടി വി ദൃശ്യങ്ങള്‍ പരിശോധിച്ചു. അധ്യാപിക വിദ്യാര്‍ഥിയെ തല്ലുന്ന ദൃശ്യവും വിദ്യാര്‍ഥി അധ്യാപികയെ തള്ളിമാറ്റി രക്ഷപ്പെടുന്ന ദൃശ്യവും സി സി ടി വിയിലുണ്ടെന്നാണ് വിവരം. തന്നെ കൈ പിടിച്ച് വലിച്ചതായും തള്ളിയിട്ടതായും ആരോപിച്ചാണ് അധ്യാപിക പരാതി നല്‍കിയത്. അധ്യാപികയുടെ പരാതിക്കെതിരെ നാട്ടുകാര്‍ ശക്തമായ പ്രതിഷേധത്തിലാണ്.
0 Comments