LATEST UPDATES

6/recent/ticker-posts

വിനോദസഞ്ചാര കേന്ദ്രങ്ങളിലെത്തുന്ന കമിതാക്കളുടെയും, ദമ്പതിമാരുടെയും ദൃശ്യങ്ങൾ പോൺ സൈറ്റുകളിൽ; മൂന്നുപേർ അറസ്റ്റിൽ

 


വിനോദസഞ്ചാര കേന്ദ്രങ്ങളിലെത്തുന്ന കമിതാക്കളുടെ ദൃശ്യങ്ങൾ രഹസ്യക്യാമറയില്‍ പകര്‍ത്തി സോഷ്യല്‍ മീഡിയയില്‍ പ്രചരിപ്പിക്കുന്ന മൂന്നംഗ സംഘത്തെ തലശേരി ടൗണ്‍ പോലീസ് അറസ്റ്റു ചെയ്തു. തലശേരി ടൗണ്‍ പോലീസ് ഇന്‍സ്‌പെക്ടര്‍ എം വി ബിജു, എസ്ഐ ആര്‍ മനു എന്നിവരുടെ നേതൃത്വത്തിലാണ് മൂന്നംഗ സംഘത്തെ അറസ്റ്റു ചെയ്തത്.


തലശേരിയിലെ ചില വിനോദസഞ്ചാര കേന്ദ്രങ്ങളിലെ കാടുമൂടിക്കിടക്കുന്ന സ്ഥലങ്ങളിലും മറ്റും പ്രതികൾ ഒളിഞ്ഞു നില്‍ക്കുകയും ഇവിടെയെത്തുന്ന കമിതാക്കളുടെ ദൃശ്യങ്ങൾ ഒളിക്യാമറയില്‍ പകര്‍ത്തി സോഷ്യല്‍ മീഡിയയില്‍ അപ്‌ലോഡ് ചെയ്യുകയുമായിരുന്നു. ഇതു പിന്നീട് ചില പോണ്‍സൈറ്റുകളില്‍ പ്രചരിച്ചതോടെയാണ് പോലീസ് അന്വേഷണമാരംഭിച്ചത്. തലശേരിയിലെ പ്രധാന പാര്‍ക്കുകളായ ഓവര്‍ബറീസ് ഫോളി, തലശേരി കോട്ട, സെഞ്ച്വറി പാര്‍ക്ക് എന്നിവടങ്ങളില്‍ നിന്നാണ് ദൃശ്യങ്ങള്‍ പകര്‍ത്തിയത്. സൈബര്‍ പോലീസിൻ്റെ സഹായത്തോടെയാണ് മൂന്ന് യുവാക്കളെ പോലീസ് അറസ്റ്റു ചെയ്തത്. ഇവരെ പിന്നീട് സ്‌റ്റേഷന്‍ ജാമ്യത്തില്‍ വിട്ടയച്ചു.

തലശേരിയിലെ വിനോദസഞ്ചാര കേന്ദ്രങ്ങളില്‍ കോളേജ് വിദ്യാര്‍ഥികള്‍ ഉള്‍പ്പെടെയുള്ള പ്രണയിതാക്കളെത്തുന്നത് പതിവുകാഴ്ചയാണ്. ഇവരില്‍ പലരും സന്ധ്യവരെ ഇവിടെ ചെലവഴിച്ചാണ് മടങ്ങുന്നത്. ഇതിനിടെയില്‍ ഇവരുടെ ദൃശ്യങ്ങള്‍ ഒളിക്യാമറയില്‍ പകര്‍ത്തി സോഷ്യല്‍ മീഡിയയില്‍ അപ്‌ലോഡു ചെയ്യുകയാണ് മൂവര്‍ സംഘം ചെയ്തതിരുന്നത്. ഇത്തരത്തില്‍ മറ്റു ചില പൂവാലസംഘം പ്രവര്‍ത്തിക്കുന്നതായി വിവരം ലഭിച്ചിട്ടുണ്ടെന്നും ഇവര്‍ക്കെതിരെ വരുംദിനങ്ങളില്‍ നടപടി ശക്തമാക്കുമെന്നും തലശേരി ടൗണ്‍ പോലീസ് അറിയിച്ചു.

കോളേജുകളിലേക്കും വിദ്യാലയങ്ങളിലേക്കും മക്കളെ രാവിലെ പറഞ്ഞുവിടുന്ന രക്ഷിതാക്കള്‍ അവര്‍ അവിടെയെത്തുന്നുണ്ടോയെന്ന് ഉറപ്പുവരുത്തണമെന്നും ഇക്കാര്യത്തില്‍ വിദ്യാഭ്യാസ സ്ഥാപന അധികൃതരും ജാഗ്രതപാലിക്കണമെന്നും പോലീസ് അറിയിച്ചു.

Post a Comment

0 Comments