ചിത്താരി ചേറ്റുകുണ്ടിൽ പോലീസ് വേഷത്തിൽ എത്തിയ സംഘം വ്യാപാരിയുടെ കാർ തടഞ്ഞ് ഒന്നര ലക്ഷം രൂപ കവർന്നു

കാഞ്ഞങ്ങാട് :ചിത്താരി ചേറ്റുകുണ്ടിൽ പൊലീസ് വേഷത്തിലെത്തിയ സംഘം കാർ തടഞ്ഞ് സിനിമാ സ്റ്റൈലിൽ വ്യാപാരിയുടെ ഒന്നര ലക്ഷം കൊള്ളയടിച്ചു.

നോർത്ത് കോട്ടച്ചേരിയിലെ വ്യാപാരി ശനഷംസുവിൻ്റെ പണം ആണ് തട്ടിയെടുത്തത്. വീട്ടിൽ നിന്നും സ്വന്തം കാറിൽ കാഞ്ഞങ്ങാട്ടേക്ക് വരികയായിരുന്നു വ്യാപാരി . ചേറ്റു കുണ്ടിലെത്തിയപ്പോൾ മറ്റാരുകാറിലെത്തിയ സംഘംഷംസുവിൻ്റെ കാർ തടഞ്ഞു. സംഘത്തിലെ ഒരാൾ പൊലീസ് വേഷത്തിലായിരുന്നു. പൊലീസാണെന്നും വാഹനം പരിശോധിക്കണമെന്നും പറഞ്ഞു. 

തുടർന്ന് കാറിലുണ്ടായിരുന്ന ഒന്നര ലക്ഷം രൂപയും ബാഗും കൈക്കലാക്കി. ശേഷം കടയിലേക്ക് സ്വന്തം കാറിൽ പോകാൻ പറഞ്ഞു. കടയും പരിശോധിക്കണമെന്നും തങ്ങൾ പിന്നാലെ വാഹനത്തിൽ വരുമെന്ന് പറഞ്ഞു. വ്യാപാരി കടയിലെത്തിയിട്ടും ഏറെ നേരം കഴിഞ്ഞിട്ടും 'പൊലീസിനെ 'കാണാതായതോടെയാണ് പണം കൊള്ളയടിച്ചതാണെന്ന് റിയുന്നത്. കെ.എൽ. 01 എന്ന നമ്പറിൽ തുടങ്ങുന്ന കാറിലാണ് സംഘമെത്തിയതെന്ന് കരുതുന്നു. ബേക്കൽ പൊലീസിൽ പരാതി നൽകി.