കാസർകോട്: നഗരത്തിലെ പഴയ ബസ് സ്റ്റാൻഡിന് സമീപത്തെ സ്വകാര്യ ലോഡ്ജിൽ പോലീസ് നടത്തിയ മിന്നൽ പരിശോധനയിൽ എം.ഡി.എം.എയുമായി യുവാവും യുവതിയും പിടിയിലായി. പടന്നക്കാട് കരുവളം സ്വദേശി മുഹമ്മദ് റാഫി (31), കടമ്പാർ ബേള സ്വദേശിനി ഷെരീഫ (35) എന്നിവരെയാണ് കാസർകോട് പോലീസ് അറസ്റ്റ് ചെയ്തത്.
ലോഡ്ജ് മുറിയിൽ ലഹരിവസ്തുക്കൾ സൂക്ഷിച്ചിട്ടുണ്ടെന്ന രഹസ്യവിവരത്തിന്റെ അടിസ്ഥാനത്തിൽ കാസർകോട് എസ്.ഐ മനു പി.വിയുടെ നേതൃത്വത്തിലുള്ള പോലീസ് സംഘമാണ് പരിശോധന നടത്തിയത്. ആദ്യഘട്ടത്തിൽ മുറിയിൽ നടത്തിയ പരിശോധനയിൽ ലഹരിവസ്തുക്കളൊന്നും കണ്ടെത്താനായിരുന്നില്ല. തുടർന്ന് എക്സൈസ് സർക്കിൾ ഇൻസ്പെക്ടറുടെ സാന്നിധ്യത്തിൽ വനിതാ പോലീസ് ഉദ്യോഗസ്ഥ ഷെരീഫയെ ദേഹപരിശോധന നടത്തിയപ്പോഴാണ് പാന്റിന്റെ പോക്കറ്റിൽ സിപ്പ് ലോക്ക് കവറിലാക്കി സൂക്ഷിച്ചിരുന്ന 0.53 ഗ്രാം എം.ഡി.എം.എ കണ്ടെത്തിയത്.
പോലീസ് മുറിയുടെ മുന്നിലെത്തി കോളിംഗ് ബെല്ലടിച്ച ശബ്ദം കേട്ടപ്പോൾ മുഹമ്മദ് റാഫിയാണ് ലഹരിമരുന്ന് തന്റെ പോക്കറ്റിൽ ഒളിപ്പിച്ചതെന്ന് ഷെരീഫ മൊഴി നൽകി. 3,000 രൂപയ്ക്ക് മറ്റൊരാളിൽ നിന്നാണ് എം.ഡി.എം.എ വാങ്ങിയതെന്ന് മുഹമ്മദ് റാഫി സമ്മതിച്ചതായി പോലീസ് അറിയിച്ചു. ലഹരിമരുന്നിന് പുറമെ, മുറിയിൽ നിന്ന് രണ്ട് ഐഫോണുകൾ ഉൾപ്പെടെ അഞ്ച് മൊബൈൽ ഫോണുകളും പണവും തിരിച്ചറിയൽ രേഖകളും പോലീസ് കസ്റ്റഡിയിലെടുത്തിട്ടുണ്ട്.
പ്രതികൾക്കെതിരെ എൻ.ഡി.പി.എസ് (NDPS) ആക്ട് പ്രകാരം കേസ് രജിസ്റ്റർ ചെയ്തു. സംഭവത്തിൽ ലഹരിമരുന്ന് എത്തിച്ചുനൽകിയവരെ കേന്ദ്രീകരിച്ച് പോലീസ് അന്വേഷണം ഊർജ്ജിതമാക്കിയിട്ടുണ്ട്.
0 Comments:
ഒരു അഭിപ്രായം പോസ്റ്റ് ചെയ്യൂ