പോണ്‍വീഡിയോകള്‍ക്ക് അടിമയായ 35കാരന് ലൈംഗികബന്ധത്തിന് വിസമ്മതിച്ച 13കാരിയായ മകളെ കൊന്ന് വനത്തില്‍ തള്ളി. തുടര്‍ന്ന് മകളെ കാണാനില്ലെന്ന് കാട്ടി ഇയാള്‍ പോലീസില്‍ പരാതി നല്‍കുകയും ചെയ്തു. ഹൈദരാബാദിലെ നദിഗദ്ദ താണ്ടയിലാണ് സംഭവം.
പരാതിയില്‍ അന്വേഷണം നടത്തിയ പോലീസ് പെണ്‍കുട്ടിയുടെ അച്ഛനായ 35കാരനെ അറസ്റ്റ് ചെയ്യുകയും ചെയ്തു. ചോദ്യം ചെയ്യലില്‍ പ്രതി കുറ്റം സമ്മതിച്ചു. ജൂണ്‍ 7നാണ് നരേഷ് എന്ന യുവാവ് മകളെ കാണാനില്ലെന്ന് കാട്ടി പോലീസില്‍ പരാതി നല്‍കിയത്.
പോലീസ് അന്വേഷണത്തില്‍ വീടിനു സമീപത്തെ വനത്തില്‍ നിന്ന് കുട്ടിയുടെ മൃതദേഹം കണ്ടെത്തുകയായിരുന്നു. തുടര്‍ന്നാണ് അച്ഛനെ ചോദ്യം ചെയ്തത്. ജൂണ്‍ 19ന് ഇയാളെ അറസ്റ്റ് ചെയ്യുകയും ചെയ്തു. പോണ്‍വീഡിയോക്ക് അടിമയായിരുന്നു നരേഷെന്നും മകളെ പീഡിപ്പിക്കാന്‍ ശ്രമിച്ചപ്പോള്‍ കുട്ടി എതിര്‍ക്കുകയും പ്രതി മകളെ കൊന്ന് വനത്തില്‍ തള്ളുകയായിരുന്നുവെന്നും പോലീസ് പറഞ്ഞു.
മഹബൂബബാദ് ജില്ലയില്‍ നിന്ന് ഭാര്യക്കും മകള്‍ക്കുമൊപ്പം ജൂണ്‍ മാസമാണ് നരേഷ് നഗരത്തിലേക്ക് താമസം മാറിയതെന്നും ഇവിടെ സ്വകാര്യ കമ്പനിയിലെ ഡെലിവറി ഏജന്റായി ജോലി ചെയ്യുകയായിരുന്നുവെന്നും പോലീസ് പറയുന്നു. സംഭവദിവസം വിറക് ശേഖരിക്കാനെന്ന വ്യാജേന പ്രതി മകളെ വനത്തിലേക്ക് കൊണ്ടുപോവുകയായിരുന്നു. ഇവിടെ വച്ച് മകളെ ബലാല്‍സംഗം ചെയ്യാന്‍ നരേഷ് ശ്രമിക്കുകയും കുട്ടി എതിര്‍ക്കുകയുമായിരുന്നു. ഇതോടെ നരേഷ് മകളെ തലയ്ക്കടിച്ചു വീഴ്ത്തി. തുടര്‍ന്ന് കഴുത്തുഞെരിക്കുകയും മരണം ഉറപ്പാക്കാന്‍ കല്ലെടുത്ത് തലയില്‍ ഇടുകയും ചെയ്തു.
ഇതിനു ശേഷം വീട്ടിലെത്തിയ നരേഷ് മകളെ കാണാനില്ലെന്ന വ്യാജ പരാതി ജൂണ്‍ 7ന് പോലീസില്‍ നല്‍കി. ആറുദിവസത്തിനു ശേഷം വനത്തില്‍ നിന്ന് അജ്ഞാത മൃതദേഹം കണ്ടെത്തിയ പോലീസ് നരേഷിന്റെ ഭാര്യയെ കൊണ്ടുപോയി മൃതദേഹം തിരിച്ചറിഞ്ഞു.
കൊലപാതകമാണെന്നു വ്യക്തമായതോടെ അന്വേഷണം വ്യാപിപ്പിച്ച പോലീസ് സിസിടിവി ദൃശ്യങ്ങള്‍ ശേഖരിച്ചപ്പോള്‍ നരേഷ് മകളെ ബൈക്കിലിരുത്തി കൊണ്ടുപോവുന്നത് കണ്ടെത്തി. പിന്നീട് ഇയാള്‍ തനിച്ചു തിരിച്ചുവരുന്നതു കൂടി കണ്ടതോടെ പോലീസ് നരേഷിനെ കസ്റ്റഡിയിലെടുത്തു വിശദമായി ചോദ്യം ചെയ്തു. ഇതോടെ നരേഷ് കുറ്റം സമ്മതിക്കുകയും പോലീസ് ഇയാളെ അറസ്റ്റ് ചെയ്യുകയുമായിരുന്നു.
0 Comments