കാസര്കോട്: മഞ്ചേശ്വരം ഉപതിരഞ്ഞെടുപ്പുമായി ബന്ധപ്പെട്ട് സമൂഹമാധ്യമങ്ങളിലൂടെയും മറ്റും രാഷ്ട്രിയ ശത്രുക്കള് നടത്തുന്ന കുപ്രചരണങ്ങള് പാര്ട്ടി പ്രവര്ത്തകര് തിരിച്ചറിയണമെന്ന് മുസ് ലിം ലീഗ് ജില്ലാ ജനറല് സെക്രട്ടറി എ. അബ്ദുല് റഹ് മാന് പ്രസ്താവിച്ചു. മുസ് ലിം ലീഗ് സംസ്ഥാന പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങള് സ്ഥാനാര്ത്ഥിയായി എം.സി.ഖമറുദ്ദീനെ പ്രഖ്യാപിച്ച നിമിഷം മുതല് മണ്ഡലത്തിലെ യു .ഡി .എഫ് പ്രവര്ത്തകര് ഒറ്റക്കെട്ടായി തിരഞ്ഞെടുപ്പ് പ്രവര്ത്തനം ആരംഭിച്ചിരിക്കയാണ്. തങ്ങളുടെ പ്രഖ്യാപനം കഴിഞ്ഞ് ഉപ്പളയിലെ നിയോജക മണ്ഡലം മുസ് ലിം ലീഗ് ഓഫീസില് എത്തിയ സ്ഥാനാര്ത്ഥിക്ക് വന് വരവേല്പ്പാണ് നല്കിയത്. നേതാക്കളടക്കം നൂറുകണക്കിന് പ്രവര്ത്തകര് എത്തിച്ചേര്ന്നിരുന്നു മറിച്ചുള്ള എല്ലാ പ്രചരണങ്ങളും സത്യവുമായി പുലബന്ധം പോലും ഇല്ലാത്തതാണ്.
മുസ് ലിം ലീഗിന്റെ മഹത്തായ പാരമ്പര്യം ഉയര്ത്തിപ്പിടിച്ചു കൊണ്ട് തന്നെ നേതാക്കളും പ്രവര്ത്തകരും ഒരു മനസ്സോടെ മുന്നോട്ട് പോകുന്നതില് വിറളി പിടിച്ച എതിരാളികള് പടച്ചു വിടുന്ന വാര്ത്തകള്ക്ക് അല്പ്പായുസ്സ് മാത്രമേയുള്ളൂ. മുസ് ലിം ലീഗിന്റെ പാരമ്പര്യം അറിയാത്തവരാണ് കുപ്രചരങ്ങള് അഴിച്ച് വിടുന്നത്. പാര്ട്ടിയില് നിന്നും ചിലര് രാജിവെച്ചുവെന്ന പ്രചരണം അസംബന്ധമാണ്.
വീഡിയോകളും, ചിത്രങ്ങളും എഡിറ്റ് ചെയ്ത് ഏത് വിധത്തിലും ഉപയോഗിക്കാമെന്നിരിക്കെ സമൂഹമാധ്യമങ്ങളിലെ കുപ്രചരണങ്ങള് തിരിച്ചറിഞ്ഞ് തള്ളിക്കളയണമെന്നും യു.ഡി.എഫ് സ്ഥാനാര്ത്ഥിയായി മത്സരിക്കുന്ന മുസ് ലിം ലീഗ് ജില്ലാ പ്രസിഡന്റ് എം.സി.ഖമറുദ്ദീനെ ചരിത്ര ഭൂരിപക്ഷത്തോടെ വിജയിപ്പിക്കാന് മുഴുവന് ജനാധിപത്യ മതേതര വിശ്വാസികളും രംഗത്തിറങ്ങി പ്രവര്ത്തിക്കാന് മുന്നോട്ട് വരണമെന്നും അദ്ദേഹം അഭ്യര്ത്ഥിച്ചു.
0 Comments:
ഒരു അഭിപ്രായം പോസ്റ്റ് ചെയ്യൂ